Ўзбекистон президенти Шавкат Мирзиёев ва Қирғизистон президенти Садир Жапаров икки мамлакат биринчи хонимлари билан биргаликда Хива шаҳридаги Ичанқалъа мажмуаси ва Нуриллабой сарой мажмуасига ташриф буюрди.
Президент матбуот хизматининг маълум қилишича, олий мартабали меҳмонлар танишувни Ота дарвозадан бошлаб, ноёб Кўҳна арк мажмуаси, Шерғозихон мадрасаси, Жума масжиди, Тошҳовли мажмуаси ва бошқа обидалар билан танишди.
-CzfjcFgD.jpg)
Меҳмонлар шарафига ўзбек халқ қўшиқлари янграб, театрлаштирилган томоша намойиш этилди.
-b-PauK6y.jpg)
Шундан сўнг Нуриллабой саройига ташриф буюрилди. Сарой-боғ мажмуаси ХХ аср бошларида бунёд этилган. Мажмуа мадраса, 100 дан ортиқ хоналар, галереялардан иборат. Сарой хоналарини безашда хивалик моҳир усталар билан бирга чет эллик рассом-декораторлар ҳам иштирок этган, улар саройнинг шарқона қиёфасига Европанинг модерн услубини сингдирган.
Хабарда айтилишича, Хива тарихи ва унинг фан ривожига қўшган ҳиссаси, шунингдек, ҳудуднинг бой маданияти ва санъати ҳақидаги ҳикоялар қирғизистонлик меҳмонларда катта таассурот қолдирди.
-oEqOY5Ji.jpg)
Хива шаҳри 1990 йилда ЮНЕСКОнинг Жаҳон мероси рўйхатига киритилган, 1997 йилда унинг 2500 йиллиги нишонланган. Шаҳар 2020 йилда Туркий дунёнинг маданий пойтахти, 2024 йилда эса Ислом дунёсининг туризм пойтахти бўлди. Очиқ осмон остидаги музей сифатида танилган Хива яхлит ёдгорлик сифатида Марказий Осиёда сақланиб қолган ягона шаҳар ҳисобланади. Бу ерда 120 дан ортиқ меъморий обидалар жойлашган.
Қирғизистон президенти Садир Жапаров рафиқаси ҳамроҳлигида 18 июль куни давлат ташрифи билан Ўзбекистонга келганди. Кўксаройда у тантанали кутиб олинди. Ўзбекистон ва Қирғизистон президентлари тор ва кенгайтирилган таркибда музокара ўтказиб, бир қатор йирик қўшма лойиҳаларга старт берди. Музокаралар якунида икки томонлама ҳужжатлар имзоланди ҳамда ОАВ вакиллари учун баёнот берилди. Президентлар рафиқалари билан бирга Ўзбекистон ва Қирғизистон санъат усталарининг концертини томоша қилди.
Изоҳ (0)