“An-Nassr” klubi hujumchisi va Portugaliya futbolining afsonasi Krishtianu Ronaldu faoliyatini yakunlagach, murabbiy bo‘lish ehtimoli haqida o‘z fikrlari bilan o‘rtoqlashdi. Bu boradagi savollarga u klub matbuot xizmatiga bergan intervyusida javob berdi.
Men oddiy qolipda fikrlaydigan inson emasman. Boshqalardan yaxshiroq emasman, lekin boshqacha o‘ylayman. Ochig‘ini aytsam, murabbiylik men uchun emas. Albatta, hayotda hamma narsa o‘zgarishi mumkin, biroq yaqin 5, 10, hattoki 20 yil ichida bu sohaga kirish haqida o‘ylaganim yo‘q, — dedi Ronaldu.
Shuningdek, Krishtianu Saudiya Arabistoniga faqat futbol o‘ynash uchun emas, balki mamlakatda davom etayotgan islohotlarga hissa qo‘shish maqsadida kelganini ta’kidladi:
Men bu yerga faqat to‘p tepish uchun kelmadim. Men bu mamlakatni o‘zgartirish jarayonining bir qismi bo‘lishni xohlayman. Ha, men portugaliyalikman, lekin bugun men allaqachon Saudiya Arabistonining bir qismiman deb o‘ylayman.
Eslatib o‘tamiz, 39 yoshli hujumchi yaqinda “An-Nassr” klubi bilan shartnomasini 2027-yilgacha uzaytirdi.
Ma’lumot uchun, o‘tgan mavsumda “An-Nassr” hech qanday sovringa ega chiqa olmadi. Saudiya Arabistoni Pro Ligasida jamoa 70 ochko jamg‘arib, uchinchi o‘rinni egalladi. Ronaldu esa barcha musobaqalarda 35 ta gol va 4 ta golli uzatma bilan jamoaning eng yaxshi to‘purari sifatida mavsumni yakunladi.
Izoh (0)