Portugaliyalik hujumchi Krishtianu Ronaldu kelajagi borasida qaror qabul qildi. Foot Mercato jurnalisti Santi Aunaning xabar berishicha, Ronaldu “An-Nassr” klubida qoladi. Tomonlar allaqachon kelishuvga erishgani va bu borada hech qanday shubha yo‘qligi ta’kidlanmoqda.
Ma’lum qilinishicha, Ronaldu Saudiya Arabistoni Suveren jamg‘armasidan raqobatbardosh jamoa shakllantirish bo‘yicha barcha zarur kafolatlarni olgan. Bu nafaqat uning shaxsiy manfaatlari uchun, balki klubning kelajagi uchun ham muhimdir. Bundan tashqari, Krishtianu “An-Nassr”ning transfer siyosatida faol ishtirok etadi va ayrim qarorlarni qabul qilishda o‘z fikrini bildiradi.
“An-Nassr”ga yaqinda yangi sport direktori kelishi kutilmoqda. Klub kamida bitta markaziy himoyachi, bitta tayanch yarim himoyachi va bitta chap qanot hujumchisini transfer qilishni rejalashtirmoqda.
Ma’lumot uchun, joriy mavsum “An-Nassr” Saudiya Pro Ligasida 70 ochko to‘plab, turnir jadvalining uchinchi pog‘onasidan joy oldi. Ular chempionlikni qo‘lga kiritgan “Al-Ittihod”dan 13 ochko ortda qoldi. 40 yoshli Ronaldu esa musobaqaning eng yaxshi to‘purariga aylangan — 25 ta gol. Uning klub bilan shartnomasi 2025-yil iyun oxirigacha mo‘ljallangan.
Izoh (0)