Ukraina prezidenti Vladimir Zelenskiy 19-iyun kungi videomurojaatida Rossiya hozirda Eronning yadro dasturini saqlab qolishga urinyotganini aytdi. Siyosatchi Yaqin Sharqdagi vaziyatga munosabat bildirdi.
Hozirgi kunda Rossiya Eron yadro dasturini qutqarishga harakat qilmoqda — ularning oshkora signallari va yashirin faoliyatini boshqacha talqin qilib bo‘lmaydi. Ularning ittifoqchilaridan biri urush eksport qilish imkoniyatini (qurol yuborish) yo‘qotsa, Rossiya aziyat chekadi va aralashishga intiladi, dedi Zelenskiy.
Shuningdek, u sanksiyalar bo‘yicha yig‘ilish o‘tkazganini, tashqi ishlar vaziri, razvedka va boshqa davlat organlariga xalqaro hamkorlarga yangi sanksiya formatlarini taklif etish vazifasini topshirganini bildirdi.
O‘t ochishni real to‘xtatish zarur. Urushni amalda tugatish kerak. Ukraina eng yuqori darajada uchrashuvga tayyor — bu aynan qarorlar qabul qilinadigan daraja. Men qaror qabul qiluvchi va tegishli vakolatlarga ega bo‘lgan shaxslar, jumladan, Putin bilan har qanday formatda uchrashishga tayyorman, garchi u konstitutsiyaviy vakolat muddatini kamida uch marta oshirgan bo‘lsa ham, dedi Zelenskiy.
Siyosatchi, shuningdek, urushni AQSH prezidenti Donald Trampning joriy prezidentlik muddati davomida yakunlash afzal bo‘lishini ta’kidladi.
Men Trampning yordamiga katta umid bog‘layman. AQSHning ta’siri juda muhim. Aynan mana shunday yordam bizga foyda beradi. Sanksiyalar kerak. Diplomatiya kerak. Xavfsizlik kerak, dedi u.
Putin Zelenskiy bilan uchrashmoqchi
Rossiya Ukrainadagi urushni “imkon qadar tezroq”, tinch yo‘l bilan tugatmoqchi ekani va muzokaralarni davom ettirishga tayyorligini ma’lum qilgan. 18-iyun yirik xalqaro axborot agentliklari bosh muharrirlari bilan suhbatda Putin ukrainalik hamskabi bilan uchrashish fikrini bildirgan.
Rossiya muzokaralarda Ukraina nomidan kim ishtirok etayotgani bilan qiziqmaydi, lekin har qanday yakuniy kelishuv qonuniy hokimiyat imzosiga ega bo‘lishi kerak, degan Putin.
Kreml uzoq vaqtdan beri Kiyevni obro‘sizlantirish uchun Zelenskiyni “noqonuniy” deb ko‘rsatishga harakat qilmoqda. Rossiya prezidenti matbuot kotibi Dmitriy Peskov 18-fevral kuni Rossiyani 20 yildan ortiq boshqargan Putin Zelenskiy bilan muzokaralarga tayyorligini, biroq “uning qonuniyligi bilan bog‘liq huquqiy jihatlar”ni ko‘rib chiqish kerakligini aytgandi.
Izoh (0)