Kanada AQSH bilan savdo muzokaralarini qayta boshlash uchun 30-iyun kuni raqamli xizmatlar solig‘ini bekor qildi. Bu haqda CNN xabar berdi.
AQSH prezidenti Donald Tramp 27-iyun kuni ikki davlat o‘rtasidagi savdo muzokaralarini bekor qilgandi. U Kanadaning raqamli xizmatlar solig‘i “Qo‘shma Shtatlarga to‘g‘ridan-to‘g‘ri va ochiqdan-ochiq hujum”, deya baholagan.
“Ushbu muzokaralarni qo‘llab-quvvatlash uchun moliya va milliy daromadlar vaziri Fransua-Filipp Shampan raqamli xizmatlar solig‘ini bekor qilishini e’lon qildi. Bu orqali AQSH bilan savdo muzokaralariga erishish ko‘zlangan. Ushbu harakatga muvofiq, bosh vazir Mark Karni va prezident Tramp 2025-yil 21-iyulgacha muzokaralarni qayta boshlashga kelishib oldi”, deyiladi bayonotda.
Raqamli xizmatlar solig‘i mamlakatlar uchun onlayn xizmatlarni soliqqa tortish usuli sanaladi. Tramp ularni “tarifsiz savdo to‘siqlari” deb atagan.
Kanada va AQSH yirik savdo hamkorlaridir. Ammo Tramp yanvar oyida prezidentlik lavozimiga qaytganidan ko‘p o‘tmay, Kanadaning eksport mahsulotiga 25 foizlik boj joriy etish bilan tahdid qilgan. Bu esa ikki mamlakat munosabatlarni o‘zgartirib yuborgan.
Kanada Amerika tovarlarining asosiy xaridori bo‘lib, 2024-yili 349 milliard dollarlik mahsulot import qilgan. Shu bilan birga, mamlakat AQSHga 413 milliard dollarlik mahsulot jo‘natgan.
Izoh (0)