Toshkent shahar Yashnobod tumanida 19 yashar yigit daraxtga osilgan holda topildi. Bosh prokuratura hodisa bo‘yicha “Daryo”ga ma’lumot berdi.
Yashnobod tumani prokuraturasi tomonidan ro‘yxatga olingan tergovga qadar tekshirish hujjatlariga ko‘ra, holat 31-may kuni taxminan soat 06:30 larda Yashnobod tumani, “M.Riyoziy” MFY, Istiqlol ko‘chasida sodir bo‘lgan.
Mazkur ko‘chadagi 1-uy oldida joylashgan daraxtda 2006-yilda tug‘ilgan Sirdaryo viloyati, Oqoltin tumani, “Ko‘rkam diyor” MFY, Baxmalsoy ko‘chasida doimiy ro‘yxatda turib yashagan O‘.F.ning arqonga osilgan holdagi murdasi aniqlangan.
Hodisa joyi tezkor-tergov guruhi tomonidan ko‘zdan kechirilgan va sud-tibbiy ekspertizasi tayinlangan. Hozirda mazkur holat yuzasidan Yashnobod tumani prokuraturasi tomonidan tergovga qadar tekshirish harakatlari olib borilmoqda.
Joniga qasd qilganlar
Toshkent viloyatida 32 yoshli ayol o‘zini kanalga tashlab, vafot etgandi. Navoiyda esa 14 yoshli o‘quvchi qiz o‘zini osib vafot etgani haqida xabar berilgandi.
Samarqand shahrida 19 yoshli qiz o‘zini 9-qavatdan tashlab joniga qasd qilgani haqida xabar berilgan edi. Hozirda marhumaning barcha oila a’zolari tergovga jalb qilingan. Onasi marhuma bir qo‘ng‘iroqdan so‘ng birdaniga o‘zini tashlab yuborganini bildirgan.
Shuningdek, 2025-yil yanvarida Qo‘qondagi talabalar turar joyida talaba qiz o‘z joniga qasd qilgani haqida xabar berilgan edi. Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan.
Yana bir holatda Toshkentdagi xonadonlardan birida fuqaro oshxonada gaz plitasini yoqish orqali o‘z joniga qasd qilishga uringan. Natijada gaz havo aralashmasi chaqnashi sodir bo‘lib yong‘in kelib chiqqandan so‘ng ushbu fuqaro 9-qavatdan o‘zini tashlash orqali halok bo‘lgani aniqlangan.
Izoh (0)