O‘zbekistonning birinchi mudofaa vaziri, general-polkovnik Rustam Ahmedov “AlterEgo” loyihasiga bergan intervyusida Tojikistondagi fuqarolar urushi yillaridagi harbiy-siyosiy jarayonlar, Imomali Rahmonning prezidentlikka qanday kelgani haqida gapirib berdi.
Uning aytishicha, 1992-1997-yillarda Tojikistonda yuz bergan fuqarolar urushi davomida prezident Islom Karimov topshirig‘iga binoan harbiy texnikani yetkazib berish, aviatsiya bilan ta’minlash, jangovar kuchlarni muvofiqlashtirish ishlariga bosh-qosh bo‘lgan.
Bu 1992-yilning fevral oyi edi. Meni prezident chaqirib, “Rizvon o‘zini Badaxshonning xo‘jayini, o‘zini qo‘mondon deb e’lon qilibdi”, dedi. Aytishlaricha, u 8-martda Dushanbeni egallayman, deya tahdid qilgan. Shunda men, imkoniyat bering, quruqlikdagi harbiy texnikalarni ko‘chiraman dedim, dedi u.
Uning so‘zlariga ko‘ra, o‘sha paytda Tojikistonning strategik joylarida islomiy qurolli guruhlar joylashib olgan. Romit darasi ham shular jumlasidan bo‘lib, u yerda qarshi harbiy operatsiyalar olib borilgan. O‘zbekiston tomonidan texnika va zarur vositalar bilan ta’minlash ishlari olib borilgan.
“Men aytdim: sizlar jang qilinglar, g‘alaba qozoninglar. Men faqat texnika, aviatsiya va boshqa narsalar bilan ta’minlayman”, deydi Ahmedov.
Rustam Ahmedov prezident Karimov tomonidan Tojikistonda siyosiy yetakchilikka munosib kadr topish vazifasi ham yuklatilganini aytarkan, Emomali Rahmonni prezidentlikka qanday qilib tavsiya qilinganini hikoya qilib bergan.
“Rahmonov o‘sha davrda Tangori tumanidagi sovxoz direktori, Oliy Kengash deputati bo‘lgan. Ubaydulloyev Ko‘lob viloyati ijroiya qo‘mitasi raisining o‘rinbosari edi. Prezident menga munosib nomzod topishni buyurdi. O‘sha paytda “qonundagi o‘g‘ri”, Xalq frontining rahbari Sangak Safarov hamda giyohvand, jinoyatchi Fayzali Saidov men bilan aloqada edi. Chunki, yagona sog‘lom kuch ular edi. Qolganlari terrorchilar edi. Ularni o‘taketgan yovvoyilar deyishardi. Ijroiya qo‘mitasida ishlagan Ubaydulloyev birinchi shaxs bo‘lishni istardi. Men u haqda gapirganimda, Sangak menga “Og‘ayni, kerak emas”, dedi. “Nega?”, deb so‘radim.
U “Sen bizga urug‘lar va makaronni tekinga berarding-ku (Makaronlar — avtomatlar, urug‘lar esa o‘qlar nazarda tutilmoqda), u o‘shalarni sotardi, o‘z odamlariga sotardi”, dedi. Shunday qilib Ubaydulloyev nomzodlikdan tushib qoldi. “Rahmonov yaxshiroq”, dedi u.
“Menga Rahmonovni olib kelinglar” dedim. Ikkalasini ham fufaykada olib kelishdi. Keyin unga “Bo‘ldi, Leninobodga borasizlar. Sessiyaga? Men seni prezidentimizga Oliy kengash raisi sifatida tavsiya qilaman” dedim. Biz ularni Termizda chiroyli qilib kiyintirdik va mening samolyotimga chiqarib, Leninobodga yubordim. Leninobodda ularni Zokir Almatov kutib oldi. O‘sha yerda uni saylab qo‘yishdi”, deydi general-polkovnik.
Izoh (0)