Yaponiyada 2017-yilda to‘qqiz kishini o‘ldirgan erkak qatl etildi. Bu mamlakatda 2022-yildan beri amalga oshirilgan ilk o‘lim jazosi hisoblanadi. Bu haqda BBC xabar berdi.
“Twitter qotili” nomi bilan tanilgan Takahiro Shiraishi tomonidan sodir etilgan ketma-ket qotilliklar butun Yaponiyani larzaga solgandi. O‘sha paytda 30 yoshli Shiraishi ijtimoiy tarmoq orqali tanishgan, asosan 15 yoshdan 26 yoshgacha bo‘lgan yosh ayollarni aldov yo‘li bilan kvartirasiga olib borib, ularni bo‘g‘ib o‘ldirgan va jasadlarini bo‘laklarga ajratgan.
Qotilliklar 2017-yil oktyabr oyida fosh bo‘lgan. O‘shanda politsiya Tokio yaqinidagi Zama shahrida qurbonlardan birini qidirayotganda, jasad bo‘laklarini topgan. Shiraishi keyinchalik o‘z joniga qasd qilishni istagan to‘qqiz kishini o‘ldirganini tan olgan. Ular bilan Twitter (hozirda X) orqali tanishgani ma’lum bo‘lgan. U qurbonlarga o‘lishlariga yordam berishi mumkinligini aytgan va ba’zi hollarda ular bilan birga o‘zini ham o‘ldirmoqchi ekanini bildirgan.
Haqiqatan ham azob chekayotgan odamlarga yordam bermoqchiman. Istalgan vaqtda menga shaxsiy xabar yozing, deb yozilgan uning Twitter profilida.
Politsiya Shiraishining uyiga borganida, u yerda muzlatkichlar va asbob-uskunalar uchun mo‘ljallangan qutilarida to‘qqiz kishining jasad qismlari topilgan. Prokurorlar Shiraishi uchun o‘lim jazosini so‘ragan. Biroq uning advokatlari qurbonlar “o‘z roziligi bilan o‘ldirilgan” deb, jazoni yengillashtirishga harakat qilgan va Shiraishining ruhiy holatini baholashni so‘ragan.
Ammo Shiraishi o‘z advokatlarining da’volariga qarshi chiqib, odamlarni ularning roziligisiz o‘ldirganini tan olgan. 2020-yil dekabr oyida u o‘lim jazosiga hukm qilinganda yuzlab odamlar sud majlisini kuzatgan. Bu qotilliklar Twitter’ning siyosatini ham o‘zgartirishga sabab bo‘lgan. Endilikda platforma foydalanuvchilarga “o‘z joniga qasd qilish yoki o‘ziga zarar yetkazishni targ‘ib qilish yoki rag‘batlantirish”ni qat’iyan taqiqlaydi.
Izoh (0)