Qirg‘iziston va Tojikiston poytaxtlarida G‘alabaning 80 yilligi munosabati bilan harbiy paradlar bo‘lib o‘tdi. Bishkek 360 mingdan ortiq qirg‘izistonlikni, Dushanbe esa 300 mingdan ortiq kishini urushga yuborgandi.
Bishkekdagi parad Alatoo maydonida, Dushanbedagi parad esa “G‘alaba” bog‘ida bo‘lib o‘tdi. Qirg‘iziston odatda bu tadbirni 9-may kuni o‘tkazadi, biroq prezident Sadir Japarov Moskvaga ketishi sababli u bugun o‘tkazilgan. Xuddi shunday sabab bilan Tojikiston prezidenti Emomali Rahmon paradni vaqtli o‘tkazishga qaror qilgan. Bishkekda 3 ming harbiy xizmatchi, Dushanbeda esa 4,5 mingga yaqin kishi paradda ishtirok etgan.
Japarov Qirg‘iziston fashizm ustidan qozonilgan g‘alabaga ulkan hissa qo‘shganini eslatgan.
Markaziy Osiyo davlatlaridan deyarli barcha erkaklar frontga ketgan. Qirg‘izistonning har to‘rtinchi fuqarosi fashistlar Germaniyasiga qarshi jang qilgan va, afsuski, ularning yarmi urushdan qaytmagan, qaytganlarning ko‘pchiligi yarador va nogiron bo‘lib qolgan.
Biz Sovet Ittifoqining barcha xalqlari vakillari bilan yelkama-yelka turib jang qilgan ota-bobolarimizni faxr bilan eslaymiz. Ular butun dunyoga buyuk Manasdan meros qolgan qahramonlik va qo‘rqmaslik namunasini ko‘rsatdi, degan Qirg‘iziston prezidenti tabrik nutqida.
Tojikiston rahbari esa urushga 300 mingdan ortiq kishi ketgani, bu mamlakat mehnatga layoqatli aholisining 50 foizini tashkil etganini aytdi.
Ularning 100 mingdan ziyodi janglarda halok bo‘lgan, 40 mingdan ortig‘i bedarak yo‘qolgan, yana 60 ming nafari urushdan nogiron bo‘lib qaytgan. Zamonaviy tariximizga abadiy muhrlangan bu fidoyiliklarning barchasi tojik xalqining ushbu buyuk g‘alabaga, butun dunyoda tinchlik va xavfsizlikni ta’minlashga qo‘shgan hissasini ifodalaydi, degan Emomali Rahmon.
U Tojikiston 100 mingdan ortiq qochqinni qabul qilganini eslatdi.
Xalqimiz ularni begona deb bilmagan, boshpana, oziq-ovqat, kiyim-kechak berib, aksarini voyaga yetkazgan, dedi siyosatchi... Biz ajdodlarimizning jasorati bilan faxrlanamiz. Ularning har biri frontda ham, front ortida ham g‘alaba qozondi. Ularning matonati bizning abadiy yo‘lko‘rsatuvchimizdir, degan Emomali Rahmon.
7-may kuni Qozog‘istonda harbiy parad bo‘lib o‘tgandi. Unda 200 dan ortiq harbiy qurol-yarog‘ va texnika, jumladan, 66 ta harbiy aviatsiya samolyoti hamda vertolyot namoyish etilgan. Parad ochilishida prezident Qosim-Jo‘mart To‘qayev bayonot berdi. U mamlakat bo‘ylab 500 ga yaqin ko‘chaga qozog‘istonlik jangchilar nomi berilishini aytgan.
Global siyosatga tajovuz va nafrat batsillalari kirib kelgan bugungi kunda davlatimizning barcha fuqarolariga urush haqidagi bor haqiqatni yetkazish juda muhimdir. Haqiqatsiz tinchlik qadrini bilib bo‘lmaydi. Urush va buyuk g‘alabaning ahamiyati haqidagi tarixiy haqiqatni buzib ko‘rsatishga yo‘l qo‘yib bo‘lmaydi, degan siyosatchi.
Izoh (0)