Turkiya 2025-yil 1-iyuldan boshlab mamlakat bo‘g‘ozlarida mahalliy portda to‘xtamasdan o‘tayotgan xorijiy kemalardan undiriladigan yig‘imlarni oshiradi. Bu haqda Turkiye Today xabar berdi.
Ushbu yangilik 2022-yilda boshlangan dengiz tariflarini bosqichma-bosqich qayta ko‘rib chiqish doirasida amalga oshirilmoqda.
Transport va infratuzilma vaziri Abdulqodir O‘rolo‘g‘li 15-iyun kuni tranzit kemalar uchun to‘lovlarni hisoblashda qo‘llaniladigan “oltin frank” etalon qiymati 15 foizga oshib, har bir tonna uchun 5,83 dollarni tashkil etishini ma’lum qilgan.
Ushbu ko‘rsatkich Bosfor va Dardanell bo‘g‘ozlaridan o‘tishni tartibga soluvchi Montryo konvensiyasi bo‘yicha asosiy to‘lovlarni aniqlash uchun ishlatiladi. Bu 2022-yildan beri tariflarning 4-qayta ko‘rib chiqilishi hisoblanadi. O‘sha yili hukumat prezident farmonidan so‘ng yillik tuzatishlarni boshlagan edi.
Bungacha oltin frankining qiymati 39 yil davomida 0,80 dollar darajasida qayd etilgan edi. Vazirning ta’kidlashicha, yangi stavka xalqaro oltin bozorlarining so‘nggi ma’lumotlarini aks ettiradi va xarajatlarni adolatliroq taqsimlashni ta’minlashga qaratilgan.
Vazirning ta’kidlashicha, so‘nggi o‘sish bilan mayoq, qutqaruv va sog‘liqni saqlash xizmatlari uchun yig‘ilgan umumiy to‘lovlar 2022-yilgacha bo‘lgan darajaga nisbatan dollarda 7,2 baravar oshgan. 2024-yilda Turkiya bo‘g‘ozidan ichki portda to‘xtamasdan jami 51 058 ta kema tranzit orqali o‘tdi. Ushbu yo‘laklardan Turkiya 227,4 million dollar yig‘gan.
Izoh (0)