Xitoy 3-sentyabr kuni bo‘lib o‘tadigan paradda AQSHga zarba bera oladigan qurollarini namoyish etadi. Sun’iy yo‘ldoshdan olingan tasvirlar ularning ayrimlarini ko‘rsatdi. Bu haqda Bloomberg xabar berdi.
Paradda eng so‘nggi zenit raketalari, jangovar dronlar va yadroviy ballistik raketalar ham ko‘rinish beradi. Ehtimol bu orqali Xitoy o‘zining harbiy qudratini namoyish etish va potensial xaridorlarni jalb qilishni rejalashtirgan. Sun’iy yo‘ldosh suratlari Pekindagi parad bo‘lib o‘tadigan maydonchadan olingan.
Rasmlarda zirhli texnikalar, havo mudofaa tizimlari, artilleriya qurollari va qanotli raketalar aks etgan. Bu ma’lumotlar Vena shahridagi Open Nuclear Network tahlilchilari tomonidan o‘rganilgan. Sun’iy yo‘ldosh suratlarida DF-41 qit’alararo ballistik raketasi ko‘ringan. U maxsus yuk mashinasida tashiladi, bir nechta jangovar kallaklarni olib yurishi mumkin va taxminan 15 ming kilometr masofaga uchadi. Bu esa uni AQSHni nishonga olishga qodir qiladi.
DF-41 ilk bor 2019-yilgi paradda namoyish etilgan. Shuningdek, sun’iy yo‘ldosh tasvirlarida yopiq holatdagi DF-100 gipersonik raketasi ham aks etgan bo‘lishi mumkin. U minglab kilometrga uchishi taxmin qilinmoqda. Xitoy armiyasining yangi qurollari eng so‘nggi texnologiyalar, jumladan gipertovushli tizimlarni o‘z ichiga oladi.
Bu esa “dengizdagi havo mudofaa tizimlarini yengish imkoniyatlarini oshiradi va aniqrog‘i, Tinch okeanining g‘arbiy qismida AQSH dengiz kuchlarini cheklash uchun ishlab chiqilgan. Juda kam davlat barcha imkoniyatlarni qamrab oluvchi bunday kemaga qarshi raketalarni ishlab chiqqan, deydi xavfsizlik bo‘yicha tadqiqot markazi mutaxassisi Tianran Xu.
Ikkinchi jahon urushi tugaganining 80 yilligi munosabati bilan o‘tkaziladigan parad Xitoy raisi Si Szinpin uchun yirik tadbirlardan biri hisoblanadi. Parad uning Rossiya prezidenti Vladimir Putin, Hindiston bosh vaziri Narendra Modi va boshqa jahon yetakchilari bilan uchrashuvidan bir necha kun keyin bo‘lib o‘tadi.
Shanxay hamkorlik tashkilotining Tyanszinda o‘tkaziladigan ushbu yig‘ilishiga Xitoydan qurol-yarog‘ xarid qiladigan bir qancha davlat rahbarlarining ham tashrif buyurishi kutilmoqda. Xitoy mudofaa kompaniyalarining aksiyalari may oyida Pokiston Hindistonning beshta qiruvchi samolyotini urib tushirish uchun Xitoyning J-10C samolyotlari va PL-15 raketalaridan foydalanganidan so‘ng ko‘tarildi.
Xitoy o‘z armiyasini modernizatsiya qilish uchun katta mablag‘ sarflamoqda. Mamlakat dunyodagi to‘rtinchi yirik qurol eksportchisi hisoblanadi. Uning mijozlari asosan cheklangan mablag‘larga ega bo‘lgan Pokiston kabi rivojlanayotgan mamlakatlardir.
Pekin gipertovushli raketalarning dunyodagi eng samarali ishlab chiqaruvchilaridan biridir. Texnologiya bir tomondan AQSH, ikkinchi tomondan Xitoy va Rossiya o‘rtasida kuchayib borayotgan raqobatning markazida turibdi. Ukraina 2024-yilda Rossiya unga qarshi shunday qurol ishlatganini ta’kidlagandi.
Izoh (0)