O‘zbekiston Superligasi 20-turi doirasida “Sho‘rtan” — “Navbahor” hamda “So‘g‘diyona” — “Dinamo” uchrashuvlari bo‘lib o‘tdi. G‘uzorda kechgan bahs gollarga boy tarzda o‘tib, jamoalar 3:3 hisobida durang natijani qayd etdi. Jizzaxdagi o‘yinda esa 1:1 hisobi qayd etildi.
O‘zbekiston Superligasi
20-tur
“Sho‘rtan” — “Navbahor” 3:3
Gollar: 1:0 — Narzullayev (3), 1:1 — Pedro (22), 2:1 — Narzullayev (33), 2:2 — Pedro (60), 2:3 — G‘ulomov (79), 3:2 — Xoldorxonov (90+6)
G‘uzorda bo‘lib o‘tgan bahsda tezkor gol kiritildi. Uchrashuvning 3-daqiqasida “Sho‘rtan” futbolchisi Doniyor Narzullayev raqib darvozasini ishg‘ol etdi. 22-daqiqaga kelib, “Navbahor”ning braziliyalik hujumchisi Pedro hisobni tenglashtirdi — 1:1. Oradan 10 daqiqa o‘tib, mezbonlar yana oldinga chiqdi. Gol muallifi yana Narzullayev bo‘ldi. Shu tariqa, birinchi bo‘lim “Sho‘rtan” foydasiga 2:1 hisobida yakunlandi.
Ikkinchi bo‘limning 60-daqiqasida Pedro dublni rasmiylashtirib, hisobni 2:2 ko‘rinishiga keltirdi. 79-daqiqada Abbos G‘ulomov mehmonlarni hisobda oldinga olib chiqdi — 2:3. Biroq o‘yin yakuniga yaqin, Po‘latxo‘ja Xoldorxonovning goli evaziga “Sho‘rtan”ga 1 ochko taqdim etdi — 3:3.
Mazkur durang natijasida “Navbahor” ochkolar sonini 32 taga yetkazib, turnir jadvalining 7-pog‘onasiga ko‘tarildi. “Sho‘rtan” esa 11 ochko bilan musobaqa jadvalining so‘nggi — 16-o‘rnini egallab turibdi.
O‘zbekiston Superligasi
20-tur
“So‘g‘diyona” — “Dinamo” 1:1
Gollar: 0:1 — Mahamadjonov (29), 1:1 — Doriyev (90+6, penalti)
Jizzaxdagi “Markaziy” stadionda bo‘lib o‘tgan “So‘g‘diyona” — “Dinamo” uchrashuvi ham murosasiz va qiziqarli kechdi. Uchrashuv boshidan boshlab har ikki jamoa navbatma-navbat hujum uyushtirdi.
Hisob 29-daqiqada ochildi — mehmonlar himoyachisi Mahmudjon Mahamadjonov “Dinamo” safidagi debyut golini urib, jamoasini oldinga olib chiqdi. U yozgi transfer oynasida “Paxtakor”dan Samarqand klubiga qo‘shilgan edi. Shu tariqa birinchi bo‘lim “Dinamo” foydasiga 0:1 hisobida yakunlandi.
Ikkinchi taymda “So‘g‘diyona” ustunlikni o‘z qo‘liga oldi. Jizzaxliklar hisobni tenglashtirish maqsadida bir nechta xavfli hujumlarni amalga oshirdi. Biroq “Dinamo” futbolchilari g‘alabani saqlab qolish uchun qat’iy harakat qildi.
Bellashuv taqdiri so‘nggi daqiqalarda hal bo‘ldi. Hakam tomonidan belgilangan 11 metrlik jarima zarbasini Lyupcho Doriyev aniq amalga oshirdi va 90+6-daqiqada hisobni 1:1 ko‘rinishiga keltirdi. Shu tariqa, “So‘g‘diyona” mag‘lubiyatdan qutulib qoldi.
Ushbu natijadan keyin “Dinamo” hisobidagi ochkolar soni 38 taga yetdi va ular turnir jadvalining 3-pog‘onasida qoldi. “So‘g‘diyona” esa 21 ochko bilan 11-o‘rinni band etgan.
Izoh (0)