Ukraina armiyasi Donbassdagi o‘z nazoratida qolgan so‘nggi yirik shaharlardan biri — Pokrovskda qurshovda qolishi xavfi mavjud. Bu haqda Pentagon manbalariga tayanib, The Washington Post xabar berdi.
Urushdan oldin deyarli 400 ming aholiga ega bo‘lgan va yiliga qariyb 2 million tonna ko‘mir qazib olgan Pokrovsk hozir xarobaga aylangan. Rossiya armiyasi 2024-yil boshidan beri shaharni egallashga urinmoqda. Pokrovsk Ukraina Qurolli Kuchlarining Donbassdagi muhim logistika markazi vazifasini bajargan. Biroq Rossiya hujumlari shaharni bog‘lovchi ko‘plab ta’minot yo‘llarini uzib qo‘ygan.
Ukraina askarlari shaharga kirish uchun atigi 15 kilometr kenglikdagi tor yo‘lakdan foydalanmoqda va bu hudud dron hujumlariga qarshi himoyasiz, deyiladi xabarda.
Finlyandiyaning Black Bird Group tahlilchisi Parsi Paroinen baholashicha, hafta boshida Pokrovsk yaqinida Rossiya qo‘shinlari Ukraina mudofaa chizig‘ini 17 kilometr ichkariga yorib o‘tishga erishdi. U vaziyat juda tez nazoratdan chiqqanini ta’kidlagan.
Rossiya kuchlari Dobropolye qishlog‘i tomon harakatlanib, ilg‘or otryadlar shaharni Kramatorsk bilan bog‘lovchi yo‘lga yetib bordi, deydi u.
Ukraina prezidenti Vladimir Zelenskiy front chizig‘i 10 kilometr ichkariga yorib o‘tilganini tan olgan. Biroq buni kichik harbiy guruhlar amalga oshirganini aytgan.
Ularning qo‘lida faqat qurol bor, texnika yo‘q. Ba’zilari allaqachon topildi: ayrimlari yo‘q qilindi, ayrimlari asirga olindi. Qolganlarini ham tez orada topib, yo‘q qilamiz, degan Zelenskiy.
Paroinenning fikricha, keyingi 48 soat “hal qiluvchi bo‘ladi” va Ukraina Qurolli Kuchlari yorib o‘tishni bartaraf eta oladimi yoki yo‘qligi shu muddatda aniqlanadi.
Amerikaning Urushni o‘rganish instituti (ISW) hisobotida qayd etilishicha, Rossiya qo‘shinlarining Dobropolye hududiga kirib borishi so‘nggi paytlardagi boshqa taktik hujumlarga qaraganda ancha tez va chuqur bo‘lgan. Ammo ruslar bu yutuqni yaqin kelajakda operativ darajadagi muvaffaqiyatga aylantira olishlariga kafolat yo‘q.
Izoh (0)