Din ishlari bo‘yicha qo‘mita diniy ta’lim olish uchun chet elga, xususan, Misr, Turkiya, Saudiya Arabistoni kabi mamlakatlarga borishga da’vat etuvchi reklama va chaqiriqlarga munosabat bildirdi.
Unda qayd etilishicha, ushbu e’lonlarda ta’lim maskanlari go‘yoki “qonuniy” yoki “rasmiy” sifatida ko‘rsatilsa-da, amalda ular O‘zbekiston tegishli idoralari tomonidan tan olinmagan hamda o‘sha mamlakatlardagi noqonuniy yoki ruxsatsiz faoliyat yurituvchi o‘quv markazlari hisoblanadi. Bu o‘rinda “rasmiy diniy ta’lim” iborasidan asosan ko‘proq talabgorlarni jalb etish maqsadida foydalanilmoqda.
“Xavotirli jihati shundaki, bunday chaqiriqlar, ko‘pincha, diniy aqidaparastlik va mutaassiblik g‘oyalarini singdirish, yoshlarimizni noto‘g‘ri yo‘lga boshlash va ularning dunyoqarashiga salbiy ta’sir ko‘rsatish xavfini o‘zida mujassam etadi. Shu sababli, ota-onalar farzandlarining kimlar bilan muloqot qilayotganiga, internetda qanday ma’lumotlarni o‘qiyotganiga va qanday takliflarga javob berayotganiga e’tiborli bo‘lishlari shart”, deyiladi munosabatda.
Shundan kelib chiqib, qo‘mita fuqarolarga rasmiy diniy ta’lim faqatgina O‘zbekiston musulmonlari idorasi tizimdagi ta’lim muassasalarida berilishi, turli shaxslarning targ‘ibotiga uchmaslikni eslatgan holda, diniy bilimlarni o‘rganishga bo‘lgan ehtiyojlarini ushbu ta’lim muassasalari imkoniyatlari orqali qondirishni tavsiya etdi.
Hozirda O‘zbekiston musulmonlari idorasi tasarrufida 4 ta oliy va 10 ta o‘rta maxsus islom ta’lim muassasalari faoliyat ko‘rsatib kelmoqda. Shu bilan birga, 2018-yildan buyon hududlardagi 28 ta “Qur’on va tajvid” kurslarida 77 mingga yaqin fuqaro ta’lim oldi. Diniy idoraning “muslim.tv” internet platformasida barcha yosh toifalari uchun mo‘ljallangan onlayn Qur’oni tajvidi darslari tashkil etilgan.
Din ishlari bo‘yicha qo‘mita xorijiy diniy ta’lim muassasalari diplomlari O‘zbekiston hududida diniy sohada faoliyat yuritish uchun asos bo‘lmasligi, ta’limdan so‘ng ishga joylashishda noqulayliklar keltirib chiqarishi mumkinligini eslatdi.
Izoh (0)