Prezident Shavkat Mirziyoyev 12-avgust kuni Buxoro viloyatida islohotlar natijadorligi va yangi loyihalar muhokamasi yuzasidan yig‘ilish o‘tkazdi. Bu haqda Prezident matbuot xizmati xabar berdi.
Maʼlum qilinishicha, yig‘ilishda oxirgi sakkiz yilda Buxoro viloyatiga 8 milliard dollardan ortiq investitsiya jalb etilgan. Xususan, sanoat sohasida 6 mingta yangi korxona ochilgan. Sanoat mahsulotlari ishlab chiqarish hajmi 6 barobardan ziyodga ko‘paygan.
Turizm infratuzilmasi yaxshilanib, yangi maskanlar tashkil etilgan. Yillik sayyohlar soni 1 million 700 ming nafarga yetgan.
Joriy yil I yarmida hududda sanoat mahsulotlari ishlab chiqarish 7,3 foizga oshgan. 198 ta yangi sanoat korxonasi tashkil topgan. Yalpi hududiy mahsulot hajmi 6,4 foizga o‘sgan.
Yig‘ilishda turkiyalik tadbirkorlar Peshku tumanida grafit qazib olish va qayta ishlashga qiziqish bildirgani aytilgan. Vyetnam kompaniyasi zamonaviy turar joy, Hindiston korxonasi jarrohlik markazi qurishni rejalashtirgani qayd etilgan. 217 gektar maydonda 260 ta loyihani amalga oshirib, 10 mingdan ortiq yangi ish o‘rni yaratish mo‘ljallangan.
Viloyatda 1 milliard 700 million dollarlik 21 ta yangi loyiha shakllantirilgan. Ular ishga tushgach 32 ming ish o‘rni, 180 million dollarlik eksport imkoniyati ochilishi ko‘zda tutilgan.
Peshku tumanida aholiga ijaraga berilgan yerlarda arzon issiqxonalar qurib, eksportbop ekinlar yetishtirish yo‘lga qo‘yilgan. Yig‘ilishda mazkur tajribani ommalashtirib, viloyat bo‘yicha qo‘shimcha 5 ming xonadonda shunday issiqxonalar tashkil etish vazifasini qo‘yilgan.
Shofirkon, G‘ijduvon, Peshku va Buxoro tumanlaridagi 10 ming gektarda uzum, Vobkent, G‘ijduvon, Jondor, Romitan va Kogonda 5 ming gektarda o‘rik, gilos, anjir kabi eksportbop meva bog‘larini barpo qilish bo‘yicha topshiriq berilgan.
Viloyatda ikkita yirik neft-gaz korxonasi mavjud bo‘lib, yana biri barpo etilyapti. Shuningdek, 10 ta yirik quyosh va shamol stansiyalari qurilishi jadallashgan. Yig‘ilishda mazkur majmualar atrofida kichik-kichik korxonalarni joylashtirib, investitsiya, sanoat va eksport hajmini oshirish mumkinligi aytilgan.
Izoh (0)