Xiaomi suv ostida ishlaydigan va smartfonga ulanmay musiqa eshitish mumkin bo‘lgan quloqchinlarni taqdim etdi

Xiaomi bosh suyagi orqali tovush uzatadigan Bone Conduction Earphones’ning ikkinchi avlodini taqdim etdi.

Quloqchin suvda suzish uchun maxsus rejimga ega. Suyak orqali eshittirish texnologiyasi tovushni tashqi va o‘rta quloqdan o‘tkazmasdan, to‘g‘ridan to‘g‘ri bosh suyagi orqali ichki quloqqa yetkazish imkonini beradi. Bunday innovatsion texnologiya tufayli quloqchinlar suv ostida ham aniq va tiniq tovush bo‘lishini ta’minlaydi.

Gadjet hech qanday smartfonga ulanmagan tarzda, mustaqil musiqa ijro eta oladi. Uning tashqi korpusi suv o‘tkazmas bo‘lib, faol turmush tarzini yurituvchi shaxslar uchun mo‘ljallangan qurilmalar ishlab chiqaruvchi Suunto brendining algoritmlarini qo‘llab-quvvatlaydi. Bu esa mashg‘ulot paytida bosib o‘tilgan masofa, tezlik, yurak urishi va boshqa ko‘rsatkichlarni kuzatish imkonini beradi.

Musiqani smartfonsiz va oflayn tinglash uchun qurilmada ichki xotira mavjud, biroq uning hajmi hozircha oshkor etilmadi. Bunday rejim foydalanuvchilarga mashg‘ulot vaqtida telefonni o‘zlari bilan olib yurish zaruratidan xalos bo‘lishga imkon beradi, suzish vaqtida esa ishonchli gidroizolyatsiyani ta’minlaydi.

Bone Conduction Earphones 2 quloqchinlarining narxi 699 yuan (taxminan 100 dollar) etib belgilangan. Gadjetni allaqachon Xitoyda oldindan buyurtma qilish mumkin, rasmiy savdolar esa 21-iyuldan boshlanadi.