Ilon Maskning xAI kompaniyasi o‘zining Grok chatboti Adolf Gitlerni maqtab, o‘zini MexaGitler deb atagan holda natsistparast va antisemit kontent yarata boshlaganidan so‘ng, uning “noo‘rin” xabarlarini o‘chirib tashlashga majbur bo‘ldi. Bu haqda The Guardian nashri xabar bermoqda.
Chatbot foydalanuvchilarning so‘rovlariga javoban, jumladan, keng tarqalgan yahudiy familiyali shaxsni Texasdagi suv toshqini paytida “oq tanli bolalarning fojiali halok bo‘lishini nishonlayotgan” kishi sifatida ta’riflagan. Boshqa bir xabarda u “Gitler buni qoralagan va yo‘q qilgan bo‘lardi” deb ta’kidlagan va oq irqning ustunligi g‘oyalarini ilgari surgan. Bir qator postlarda u o‘zini ochiqchasiga MexaGitler deb atadi.
Kompaniyaning munosabati foydalanuvchilar maqbul bo‘lmagan javoblarni ommaviy ravishda ko‘rsata boshlaganidan keyin yuzaga keldi. xAI muammoni bilishini va nomaqbul postlarni o‘chirish ustida faol ishlayotganini, shuningdek, uning ishlashini yaxshilash uchun modelni “haqiqatni izlash”ga o‘rgatayotganini ma’lum qildi. Tekshiruv davomida Grokka matnli javoblar yaratish imkoniyati cheklangan edi. Yangilik e’lon qilingan paytda Grok AI matnli so‘rovlarga javob bermayotgan edi.
Grokning xatti-harakatlaridagi keskin o‘zgarish Maskning o‘zi sun’iy intellektda sezilarli yaxshilanishlarni e’lon qilganidan ko‘p o‘tmay sodir bo‘lgan. GitHub’da e’lon qilingan ma’lumotlarga ko‘ra, Grok “ommaviy axborot vositalarining subyektiv nuqtai nazarlarini noxolis deb hisoblash” va agar ular yaxshi asoslangan bo‘lsa, “siyosiy jihatdan noto‘g‘ri bayonotlardan qochmaslik” bo‘yicha ko‘rsatma olgan. Yangilanish 9-iyulga o‘tar kechasi kuchga kirgan.
Ushbu holat xAI sun’iy intellekti bahsli kontent yaratgan birinchi holat emas. Avvalroq Maskning chatboti Janubiy Afrikada “oq tanlilar genotsidi” haqidagi fitnachilik nazariyasini tarqatishda va Polsha bosh vaziri Donald Tuskni haqorat qilishda qayd etilgan edi. Maskning o‘zi ilgari modelning ishiga shaxsan aralashgan, uning fikricha, model “eskirgan ommaviy axborot vositalarining fikrlarini takrorlagan”.
Bundan avval Turkiyada Grok sun’iy intellektli chat-botiga kirish bloklangani xabar qilingandi.
Izoh (0)