Andijon viloyatining Xo‘jaobod tumanida maishiy chiqindilarni yoqish orqali elektr energiyasi ishlab chiqaruvchi zavod qurilishi boshlandi.
Chiqindilarni boshqarish va sirkulyar iqtisodiyotni rivojlantirish agentligining xabar qilishicha, zavod Xitoyning China International Camce kompaniyasi ishtirokida barpo etiladi. Loyihaning umumiy qiymati 140 million AQSH dollari miqdorida bo‘lib, bu orqali kuniga 1,5 ming tonna chiqindi qayta ishlanib, yiliga jami 240 mln kVt/soat elektr energiyasi ishlab chiqariladi.
Zavod 2025—2027-yillarda qurilib, foydalanishga topshiriladi va unda 100 ta yangi ish o‘rni yaratiladi.
Ushbu chora-tadbirlar prezidentning 2025-yil 24-mart kunidagi “Qattiq maishiy chiqindilarni yoqish orqali elektr energiyasi ishlab chiqarish investitsiya loyihalarini amalga oshirish chora-tadbirlari to‘g‘risida”gi qarori ijrosi yuzasidan amalga oshirilmoqda.
“Bular shunchaki zavod emas, hayot-mamotimizni hal qiladigan masalalardan biri. Yer-suvlarimizning yaroqliligi ham, aholi salomatligi ham, havo tozaligi-yu energetika barqarorligiyam shu sohaga bog‘liq. Chiqindilar to‘g‘ri to‘planib, ko‘proq qayta ishlansa, ekologik muvozanat yaxshilanadi, tabiat toza bo‘ladi, jamiyat o‘zgaradi”, degandi prezident loyihalarning ijtimoiy ahamiyatiga alohida urg‘u berib.
Bunday loyihalar 2025—2027-yillarda Andijondan tashqari, Buxoro, Jizzax, Qashqadaryo, Navoiy, Namangan, Samarqand, Sirdaryo, Farg‘ona, Toshkent viloyatlari va Toshkent shahrida amalga oshirilishi rejalashtirilgan.
Izoh (0)