Moskvada huquq-tartibot organlari xodimlari ozarbayjonlik “qonundagi o‘g‘ri” Vagif Sulaymonovni qo‘lga oldi. Bu haqda “Kommersant” xabar berdi.
Qo‘lga olingan shaxs Vagif Bokuliy va “diplomat” laqablari bilan ham tanilgan. Uning hibsga olinishiga Rossiyada bo‘lish qoidalarini buzgani sabab bo‘lgan. Sulaymonovni o‘z vataniga yuborish uchun Moskva Ichki ishlar bosh boshqarmasining Chet el fuqarolarini vaqtincha saqlash markaziga (“Saxarovo”) jo‘natilgan.
Rossiya kuch ishlatar tuzilmalariga yaqin bo‘lgan “VCHK-OGPU” va “112” Telegram kanallari Sulaymonovning qo‘lga olinishi tasvirlangan videoni e’lon qilgan. Kadrlarda SOBR (Maxsus tezkor javob qaytarish otryadi) xodimi yerda yuztuban yotgan erkakning ustida o‘tirgani ko‘rinadi. Yerda yotgan odam talabga javoban kadr ortida o‘zini tanishtirgan.
“Siz jinoiy avtoritetmisiz? O‘g‘rimisiz?”, deb so‘rashgan undan. Sulaymonov esa “bunday savollarga javob bermasligi”ni ma’lum qilgan.
“Baza” Telegram kanalining yozishicha, Orenburgda “Ozarbayjondan yana bir avtoritet — Zaur ham hibsga olingan”. U jinoiy iyerarxiyada eng yuqori o‘rinni egallaganlikda ayblangan.
Vagif Sulaymonovni Moskvadagi turli biznes loyihalari, jumladan, milliarder God Nisanovning “Fud-Siti” kompleksi bilan bog‘lashadi. Sulaymonov 1965-yilda Tbilisida tug‘ilgan, Bokuda yashagan, 1990-yillarda esa Rossiyaga ko‘chib ketgan.
“Praym Kraym” sayti ma’lumotlariga ko‘ra, Sulaymonov o‘g‘rilik va giyohvand moddalarni saqlash bo‘yicha bir necha marta sudlangan. U 2013-yilda o‘ldirilgan “qonundagi o‘g‘ri” Aslan Usoyan (Ded Hasan)ning yaqin kishisi hisoblangan.
Sulaymonovning hibsga olinishi Yekaterinburgda ozarbayjonlik fuqarolarni qo‘lga olish bilan bog‘liqligi aniq emas. 27-iyun kuni shaharda qotillik ishi bo‘yicha Ozarbayjon fuqarolarini ommaviy hibsga olishlar o‘tkazildi. Qo‘lga olinganlar orasidagi aka-uka Huseyn va Ziyaddin Safarovlar vafot etdi. Ularning tanasida kaltaklash va qiynoq izlari borligi ma’lum bo‘ldi. Ozarbayjon hukumati Rossiya xavfsizlik kuchlarining bu harakatlariga javoban Bokuda 10 dan ortiq rossiyalik fuqaroni hibsga olib, kaltakladi.
Izoh (0)