O‘zbekiston Respublikasi prezidenti tashabbusi bilan “Dolzarb 90 kun” loyihasi yo‘lga qo‘yildi. Loyiha doirasida 1-iyundan 30-avgustgacha maktab o‘quvchilari va uyushmagan yoshlarning bo‘sh vaqtini mazmunli o‘tkazish, ularni sog‘lomlashtirish va har tomonlama rivojlantirish bo‘yicha keng ko‘lamli ishlar olib boriladi.
Ta’lim, ijod, sport va sog‘lom turmush sari yo‘l
Toshkent shahridagi 326 ta umumta’lim maktabida o‘tkazilgan so‘rovnomada 494 208 o‘quvchidan 169 551 nafari yoz mavsumidagi turli tadbir va oromgohlarga jalb etilishi rejalashtirilgan.
Jumladan:
• 21 ta statsionar oromgohda 31 000 dan ortiq o‘quvchi dam oladi;
• 100 ta maktabda “kunduzgi oromgoh”lar tashkil etilib, ularda 50 mingdan ziyod o‘quvchi 12 kunlik mavsumlarda qatnashadi;
• IT, robototexnika, oshpazlik, chet tili, kasb-hunar yo‘nalishlari bo‘yicha 15 000 dan ortiq o‘quvchi maxsus kurslarga jalb qilinadi;
• 207 ta sport maydonchasida sport sog‘lomlashtirish mashg‘ulotlari va musobaqalari tashkil etilib, 41 400 o‘quvchi qamrab olinadi.
2025-yil 29-may kuni Toshkent shahrida o‘quvchilarning yozgi ta’tilini mazmunli va samarali tashkil etish bo‘yicha amalga oshirilgan ishlar yuzasidan press-tur tashkil etildi. Tadbir doirasida jurnalistlar, blogerlar va ommaviy axborot vositalari vakillari uchta muhim maskanda bo‘ldi.
1-manzil, Chilonzor tumanidagi 202-sonli maktabda yozgi mavsum tadbirlarini tashkil etish bo‘yicha seminar o‘tkazildi va bolalarning yozgi ta’tili uchun yaratilgan shart-sharoitlar bilan tanishtirildi.
Har bir oromgoh ishtirokchisi bir martalik issiq nonushta bilan ta’minlanadi. Gigiyena, xavfsizlik va infratuzilma holati tuman hokimliklari hamda mutasaddi xodimlar tomonidan doimiy nazorat qilinadi.
Prezidentimiz tashabbusi bilan boshlangan “Dolzarb 90 kun” loyihasi pedagoglar uchun juda muhim tashabbus bo‘ldi. Bolalar to‘qqiz oy davomida maktabda tahsil olib charchagan bo‘lishadi, shu bois yozgi ta’til kunlarini mazmunli, maroqli va sog‘lom o‘tkazishlari muhim. Toshkent shahridagi 100 ta maktabda kunduzgi oromgohlar tashkil etilgan. Shuningdek, har bir maktabda sog‘lomlashtirish maydonchalari, to‘garaklar faoliyati yo‘lga qo‘yilmoqda. Oromgohlar soat 8:00 dan 12:00 gacha ishlaydi, bu davr mobaynida bolalar bir martalik issiq nonushta bilan ta’minlanadi. Bu ishlarning barchasida tuman hokimliklari ko‘mak bermoqda, deydi Toshkent shahar maktabgacha va maktab ta’limi boshqarmasi boshlig‘i.
O‘tkazilgan seminar chog‘ida to‘garaklar uchun mo‘ljallangan xonalar, oshxona va sanitariya sharoitlari bilan tanishildi. Mazkur maskan loyihani amalga oshirish uchun zaruriy moddiy-texnik baza bilan ta’minlangan. Xonalar kompyuter va interaktiv doskalar va bolalar uchun foydali bo‘lgan buyumlar bilan to‘ldirilgan.
Iyun oyidan boshlanadigan yozgi oromgohda 100 nafar bola uchun mo‘ljallangan to‘garak xonalari birma-bir ko‘rib chiqildi.
Yozgi ta’tilni samarali tashkil etish bo‘yicha berilgan topshiriqlarning asosiy maqsadi — ota-onalar ishda bo‘lgan paytda bolalarning vaqtini uyda bekor o‘tkazishining oldini olishdir. Shu sababli har bir maktabda kunduzgi oromgohlar tashkil etilib, ularda sport, rassomchilik, shaxmat, shashka kabi sakkizga yaqin yo‘nalishda to‘garaklar faoliyati yo‘lga qo‘yilishi belgilandi. Shuningdek, yoshlar orasida yo‘l harakati xavfsizligi masalasi ham dolzarb hisoblanadi. Hozirgi kunda yoshlar ijaraga avtomobil olib, ba’zida avariyalarga sabab bo‘layotgani, buning oqibatida achinarli o‘lim holatlari yuz berayotgani sababli, ichki ishlar organlari yo‘l harakati xavfsizligini ta’minlash bo‘yicha maxsus xodimlarni jalb qilmoqda, deydi Alisher Hatamov.
Poytaxtdagi 100 ta maktabda 5 mavsumga mo‘ljallangan bepul “Kunduzgi oromgoh”lar ishga tushmoqda. Har bir mavsum 12 kundan, kunlik ish vaqti esa 08:00 dan 12:00 gacha etib belgilangan. 50 mingdan ortiq o‘quvchi mazkur oromgohlarda qamrab olinadi.
Madaniy-ma’rifiy muhit — har bir tumanda
Press turning 2-manzili Uchtepa tumani Zulfiyaxonim nomidagi 14-sonli madaniyat markazi bo‘ldi.
Raqs, estrada xonandaligi, aktyorlik, tasviriy san’at, cholg‘u ijrochiligi bo‘yicha bolalar va yoshlar uchun ko‘plab darslar tashkil qilinadi. “Ochiq eshiklar kuni”, “Nafosat malikasi”, “Sog‘lom oila — yangi O‘zbekiston tayanchi” kabi loyihalar bilan madaniy va ma’naviy muhit mustahkamlanadi.
“Dolzarb 90 kun” davomida har kuni soat 19:00 dan 22:00 gacha “Navro‘z bog‘i”da, shuningdek, har bir tuman madaniyat va istirohat bog‘larida, madaniyat markazlarida konsert dasturlari, mahorat saboqlari, ko‘rgazmalar va ijodiy to‘garaklar o‘tkaziladi.
Sport orqali sog‘lom avlod sari
OAV xodimlari navbatdagi manzil — Uchtepa tumani 2-son sport maktabiga bordi. Poytaxtimizda shu kabi 23 ta sport maktablari bor. Ularning barchasi yozgi oromgoh ishtirokchilariga o‘z eshiklarini ochadi. Shuningdek, 500 nafardan ortiq malakali sport murabbiylari bolalar bilan ishlashga jalb etiladi.
Qolaversa, yozgi oromgoh ishtirokchilari 21 ta suzish havzalarida bepul shug‘ullanishlari ham mumkin bo‘ladi.
Futbol, voleybol, milliy kurash, yengil atletika, suzish, shaxmat kabi sport turlari bo‘yicha musobaqalar, “Yangi O‘zbekiston olimpiyachilari”, “Besh tashabbus olimpiadasi”, “5 ming qadam yurish marafonlari” kabi tashabbuslar orqali 490 mingga yaqin yosh sport faoliyatiga jalb qilinadi.
“Dolzarb 90 kun” dasturi yozgi ta’tilni nafaqat dam olish, balki o‘quvchi-yoshlar uchun o‘sish, o‘rganish, rivojlanish va yangi imkoniyatlar sari yo‘l sifatida qaralayotganini ko‘rsatmoqda. Mazkur tashabbus kelajak avlodning sog‘lom, bilimli va faol bo‘lib ulg‘ayishi uchun muhim zamin yaratadi.
Izoh (0)