Ўзбекистон Республикаси президенти ташаббуси билан “Долзарб 90 кун” лойиҳаси йўлга қўйилди. Лойиҳа доирасида 1 июндан 30 августгача мактаб ўқувчилари ва уюшмаган ёшларнинг бўш вақтини мазмунли ўтказиш, уларни соғломлаштириш ва ҳар томонлама ривожлантириш бўйича кенг кўламли ишлар олиб борилади.
Таълим, ижод, спорт ва соғлом турмуш сари йўл
Тошкент шаҳридаги 326 та умумтаълим мактабида ўтказилган сўровномада 494 208 ўқувчидан 169 551 нафари ёз мавсумидаги турли тадбир ва оромгоҳларга жалб этилиши режалаштирилган.
Жумладан:
• 21 та стационар оромгоҳда 31 000 дан ортиқ ўқувчи дам олади;
• 100 та мактабда “кундузги оромгоҳ”лар ташкил этилиб, уларда 50 мингдан зиёд ўқувчи 12 кунлик мавсумларда қатнашади;
• IT, робототехника, ошпазлик, чет тили, касб-ҳунар йўналишлари бўйича 15 000 дан ортиқ ўқувчи махсус курсларга жалб қилинади;
• 207 та спорт майдончасида спорт соғломлаштириш машғулотлари ва мусобақалари ташкил этилиб, 41 400 ўқувчи қамраб олинади.
2025 йил 29 май куни Тошкент шаҳрида ўқувчиларнинг ёзги таътилини мазмунли ва самарали ташкил этиш бўйича амалга оширилган ишлар юзасидан пресс-тур ташкил этилди. Тадбир доирасида журналистлар, блогерлар ва оммавий ахборот воситалари вакиллари учта муҳим масканда бўлди.
1-манзил, Чилонзор туманидаги 202-сонли мактабда ёзги мавсум тадбирларини ташкил этиш бўйича семинар ўтказилди ва болаларнинг ёзги таътили учун яратилган шарт-шароитлар билан таништирилди.
Ҳар бир оромгоҳ иштирокчиси бир марталик иссиқ нонушта билан таъминланади. Гигиена, хавфсизлик ва инфратузилма ҳолати туман ҳокимликлари ҳамда мутасадди ходимлар томонидан доимий назорат қилинади.
Президентимиз ташаббуси билан бошланган “Долзарб 90 кун” лойиҳаси педагоглар учун жуда муҳим ташаббус бўлди. Болалар тўққиз ой давомида мактабда таҳсил олиб чарчаган бўлишади, шу боис ёзги таътил кунларини мазмунли, мароқли ва соғлом ўтказишлари муҳим. Тошкент шаҳридаги 100 та мактабда кундузги оромгоҳлар ташкил этилган. Шунингдек, ҳар бир мактабда соғломлаштириш майдончалари, тўгараклар фаолияти йўлга қўйилмоқда. Оромгоҳлар соат 8:00 дан 12:00 гача ишлайди, бу давр мобайнида болалар бир марталик иссиқ нонушта билан таъминланади. Бу ишларнинг барчасида туман ҳокимликлари кўмак бермоқда, дейди Тошкент шаҳар мактабгача ва мактаб таълими бошқармаси бошлиғи.
Ўтказилган семинар чоғида тўгараклар учун мўлжалланган хоналар, ошхона ва санитария шароитлари билан танишилди. Мазкур маскан лойиҳани амалга ошириш учун зарурий моддий-техник база билан таъминланган. Хоналар компьютер ва интерактив доскалар ва болалар учун фойдали бўлган буюмлар билан тўлдирилган.
Июнь ойидан бошланадиган ёзги оромгоҳда 100 нафар бола учун мўлжалланган тўгарак хоналари бирма-бир кўриб чиқилди.
Ёзги таътилни самарали ташкил этиш бўйича берилган топшириқларнинг асосий мақсади — ота-оналар ишда бўлган пайтда болаларнинг вақтини уйда бекор ўтказишининг олдини олишдир. Шу сабабли ҳар бир мактабда кундузги оромгоҳлар ташкил этилиб, уларда спорт, рассомчилик, шахмат, шашка каби саккизга яқин йўналишда тўгараклар фаолияти йўлга қўйилиши белгиланди. Шунингдек, ёшлар орасида йўл ҳаракати хавфсизлиги масаласи ҳам долзарб ҳисобланади. Ҳозирги кунда ёшлар ижарага автомобиль олиб, баъзида аварияларга сабаб бўлаётгани, бунинг оқибатида ачинарли ўлим ҳолатлари юз бераётгани сабабли, ички ишлар органлари йўл ҳаракати хавфсизлигини таъминлаш бўйича махсус ходимларни жалб қилмоқда, дейди Алишер Ҳатамов.
Пойтахтдаги 100 та мактабда 5 мавсумга мўлжалланган бепул “Кундузги оромгоҳ”лар ишга тушмоқда. Ҳар бир мавсум 12 кундан, кунлик иш вақти эса 08:00 дан 12:00 гача этиб белгиланган. 50 мингдан ортиқ ўқувчи мазкур оромгоҳларда қамраб олинади.
Маданий-маърифий муҳит — ҳар бир туманда
Пресс турнинг 2-манзили Учтепа тумани Зулфияхоним номидаги 14-сонли маданият маркази бўлди.
Рақс, эстрада хонандалиги, актёрлик, тасвирий санъат, чолғу ижрочилиги бўйича болалар ва ёшлар учун кўплаб дарслар ташкил қилинади. “Очиқ эшиклар куни”, “Нафосат маликаси”, “Соғлом оила — янги Ўзбекистон таянчи” каби лойиҳалар билан маданий ва маънавий муҳит мустаҳкамланади.
“Долзарб 90 кун” давомида ҳар куни соат 19:00 дан 22:00 гача “Наврўз боғи”да, шунингдек, ҳар бир туман маданият ва истироҳат боғларида, маданият марказларида концерт дастурлари, маҳорат сабоқлари, кўргазмалар ва ижодий тўгараклар ўтказилади.
Спорт орқали соғлом авлод сари
ОАВ ходимлари навбатдаги манзил — Учтепа тумани 2-сон спорт мактабига борди. Пойтахтимизда шу каби 23 та спорт мактаблари бор. Уларнинг барчаси ёзги оромгоҳ иштирокчиларига ўз эшикларини очади. Шунингдек, 500 нафардан ортиқ малакали спорт мураббийлари болалар билан ишлашга жалб этилади.
Қолаверса, ёзги оромгоҳ иштирокчилари 21 та сузиш ҳавзаларида бепул шуғулланишлари ҳам мумкин бўлади.
Футбол, волейбол, миллий кураш, енгил атлетика, сузиш, шахмат каби спорт турлари бўйича мусобақалар, “Янги Ўзбекистон олимпиячилари”, “Беш ташаббус олимпиадаси”, “5 минг қадам юриш марафонлари” каби ташаббуслар орқали 490 мингга яқин ёш спорт фаолиятига жалб қилинади.
“Долзарб 90 кун” дастури ёзги таътилни нафақат дам олиш, балки ўқувчи-ёшлар учун ўсиш, ўрганиш, ривожланиш ва янги имкониятлар сари йўл сифатида қаралаётганини кўрсатмоқда. Мазкур ташаббус келажак авлоднинг соғлом, билимли ва фаол бўлиб улғайиши учун муҳим замин яратади.
Изоҳ (0)