Defence Blog nashrining yozishicha, ruslarning Su-75 Checkmate qiruvchi samolyot loyihasi amalda to‘xtab qolgan. Tahlilchilarga ko‘ra, urush, sanksiyalar, harbiy prioritetlarning o‘zgarishi hamda chet ellik xaridorlar yo‘qligi kabi omillar sabab u butunlay tugatilishi ham mumkin.
2021-yili taqdim etilgan Su-75 G‘arb qiruvchilari, asosan Qo‘shma Shtatlarning F-35 samolyotiga arzonroq muqobil sifatida ko‘rilardi. U beshinchi avlodga mansubligi aytiladigan yana bir rus qiruvchisi Su-57 dan bitta dvigatelga egaligi bilan farqlanadi. Biroq jamoatchilik xabardor etilganidan uch yil o‘tgan bo‘lsa-da, u hanuzgacha faqat maket holida qolmoqda. 2023-yilga rejalashtirilgan sinov parvozi esa noma'lum sababga ko‘ra amalga oshmadi.
Qo‘shma Shtatlarda yashovchi jurnalist Caleb Larson 19FortyFive nashrida material e'lon qilib, mazkur samolyot haqida “u hech qayerga uchmaydi” yozdi.
Urush va sanksiyalar loyihani sekinlashtirdi.
Rossiyaning Ukrainaga keng ko‘lamli bosqini ortidan Kreml resurslarini qimmat aviatsiya loyihalariga emas, balki artilleriya, dron va raketa ishlab chiqarishga yo‘naltira boshlagan. G‘arb sanksiyalari tufayli zamonaviy elektron komponentlar, ayniqsa mikrochiplar yetishmayapti.
Bundan tashqari, qimmat loyihalarni moliyalash ham muammo bo‘lmoqda. Rossiya hukumati resurslarning katta qismini frontdagi ehtiyojlar va halok bo‘lgan harbiylar oilalariga ijtimoiy to‘lovlarga yo‘naltirmoqda.
Chet eldan xaridor topilmayapti
Loyiha taqdim etilgan payt Su-75 eksportga mo‘ljallangani aytilgan edi. Biroq Rossiyaning eng qalin ittifoqchilari ham yangi samolyotga qiziqish bildirmayapti. Ular F-35 kabi sinovdan o‘tgan modellarni afzal ko‘rmoqda.
Larsonning qayd etishicha, mazkur loyihani tashqi bozorga chiqish imkonidan mahrum qilayotgan omillar orasida “texnologik muammolar”, “iqtisodiy bosim” va “xalqaro izolyatsiya” kabilar ham bor.
Izoh (1)
Россия