Defence Блог нашрининг ёзишича, русларнинг Су-75 Checkmate қирувчи самолёт лойиҳаси амалда тўхтаб қолган. Таҳлилчиларга кўра, уруш, санкциялар, ҳарбий приоритетларнинг ўзгариши ҳамда чет эллик харидорлар йўқлиги каби омиллар сабаб у бутунлай тугатилиши ҳам мумкин.
2021 йили тақдим этилган Су-75 Ғарб қирувчилари, асосан Қўшма Штатларнинг F-35 самолётига арзонроқ муқобил сифатида кўриларди. У бешинчи авлодга мансублиги айтиладиган яна бир рус қирувчиси Су-57 дан битта двигателга эгалиги билан фарқланади. Бироқ жамоатчилик хабардор этилганидан уч йил ўтган бўлса-да, у ҳанузгача фақат макет ҳолида қолмоқда. 2023 йилга режалаштирилган синов парвози эса номаълум сабабга кўра амалга ошмади.
Қўшма Штатларда яшовчи журналист Cалеб Ларсон 19FortyFive нашрида материал эълон қилиб, мазкур самолёт ҳақида “у ҳеч қаерга учмайди” ёзди.
Уруш ва санкциялар лойиҳани секинлаштирди.
Россиянинг Украинага кенг кўламли босқини ортидан Кремль ресурсларини қиммат авиация лойиҳаларига эмас, балки артиллерия, дрон ва ракета ишлаб чиқаришга йўналтира бошлаган. Ғарб санкциялари туфайли замонавий электрон компонентлар, айниқса микрочиплар етишмаяпти.
Бундан ташқари, қиммат лойиҳаларни молиялаш ҳам муаммо бўлмоқда. Россия ҳукумати ресурсларнинг катта қисмини фронтдаги эҳтиёжлар ва ҳалок бўлган ҳарбийлар оилаларига ижтимоий тўловларга йўналтирмоқда.
Чет элдан харидор топилмаяпти
Лойиҳа тақдим этилган пайт Су-75 экспортга мўлжаллангани айтилган эди. Бироқ Россиянинг энг қалин иттифоқчилари ҳам янги самолётга қизиқиш билдирмаяпти. Улар F-35 каби синовдан ўтган моделларни афзал кўрмоқда.
Ларсоннинг қайд этишича, мазкур лойиҳани ташқи бозорга чиқиш имконидан маҳрум қилаётган омиллар орасида “технологик муаммолар”, “иқтисодий босим” ва “халқаро изоляция” кабилар ҳам бор.
Изоҳ (1)
Россия