Qozog‘istonning “Jetisu” futbol klubi direktori Kalmuxamet Donsebayev davlat mablag‘larini o‘zlashtirishda aybdor deb topildi. Bu haqda Qozog‘iston Antikorrupsiya xizmati matbuot xizmati xabar bermoqda.
Manbaga ko‘ra, Donsebayev davlat byudjetidan ajratilgan 31,9 million tenge (salkam 64 ming dollar) mablag‘ni talon-toroj qilgani aniqlangan. Ushbu mablag‘ futbolchilarning ovqatlanishi va o‘quv-mashg‘ulot yig‘inlari uchun ajratilgani aytilmoqda.
Direktor og‘ir kasalligi va yetkazilgan zararni to‘liq qoplagani bois 7 yilga ozodlikni cheklash jazosi tayinlandi. Shuningdek, unga davlat xizmatida va davlat sektorida ishlash umrbod taʼqiqlangan.
Donsebayev 2024-yil iyun oyida hibsga olingan edi. Dastlab Antikorrupsiya xizmati unga 85,4 million tenge mablag‘ni o‘zlashtirish bo‘yicha ayblov qo‘ygan va mablag‘larni ishonchli shaxslarning hisob raqamlariga o‘tkazgani gumon qilingan edi.
Ma’lumot uchun Donsebayev 1995-yildan “Jetisu” aviakompaniyasiga rahbarlik qilgan, 2022-yil yanvar oyida esa “Jetisu” futbol klubi direktori lavozimiga tayinlangan.
Izoh (0)