“O‘zgidromet” yanvarning so‘nggi va fevral oyining dastlabki kunlari uchun ob-havo prognozini e’lon qildi.
Unga ko‘ra, 31-yanvar juma kuni kunduzi O‘zbekiston hududi bo‘yicha yog‘ingarchiliksiz ob-havo bo‘lishi kutilmoqda, faqat Farg‘ona vodiysi viloyatlarida, Navoiy viloyatining shimolida va kechga tomon Toshkent viloyatida baʼzi joylarda biroz qor yog‘ishi mumkin. Harorat 0-5 daraja iliq bo‘ladi.
Shanba va yakshanba kunlari respublika bo‘yicha havo biroz bulutli, baʼzi joylarda o‘zgaruvchan bo‘ladi, yog‘ingarchilik kutilmaydi. Kechalari sovuq ob-havo saqlanib turadi, harorat 0-5 daraja sovuq atrofida bo‘ladi, kunduz kunlari esa 5-8 daraja iliq, janubda 10-12 daraja iliq atrofida bo‘ladi.
Respublikaning ayrim joylariga tuman tushishi mumkin. Shamol sharqdan 7-12 metr/sekund tezlikda esadi.
Toshkentda 31-yanvar, juma kuni havo biroz bulutli bo‘ladi, kechga tomon kuchsiz qor yog‘ishi mumkin. Harorat 2-4 daraja iliq bo‘ladi. Shanba va yakshanba kunlari yog‘ingarchilik kutilmaydi. Kechasi va ertalab tuman tushishi mumkin. Harorat kechalari 2-5 daraja sovuq, kunduz kunlari 5-8 daraja iliq bo‘ladi.
“O‘zgidromet” fevral oyi uchun ob-havo prognozini ham e’lon qildi. Unga ko‘ra oy bir hafta davomida saqlanib turadigan quruq ob-havo bilan boshlanadi. Ikkinchi va uchinchi o‘n kunliklarda 2-3 kundan yog‘ingarchilik (yomg‘ir, qor) bo‘lishi kutilmoqda.
Izoh (0)