Tarmoqlarda Rossiya askarlari tomonidan foydalanilayotgan BTR-50 zirhli transport vositasining yangi suratlari paydo bo‘ldi. Ular orasida BPU-1 minorasi bilan jihozlangan BTR-50PK jangovar mashinasi va BTR-50PU qo'mondonlik variant ham bor. Bunga Defence Express nashri e’tibor qaratdi.
E’tiborli tomoni, zirhli texnikalar dronlarga qarshi qafas ko'rinishidagi himoya qoplamalari bilan “modernizatsiya qilingan”. Ma’lum qilinishicha, rossiyaliklar bu kabi texnikalarni Donetsk viloyatiga joylashtirmoqda.
Rossiya armiyasi allaqachon eskirib bo‘lgan BTR-50 zirhli transport vositalarini jang maydonida qo‘llayotgani haqida ilk xabarlar qariyb ikki yil avval, 2023-yilning fevralida paydo bo‘lgan edi. O‘shanda tarmoqlarda mazkur texnikalar frontga olib ketilayotgani aks etgan tasvirlar tarqalgan.
2023-yilning bahoriga kelib, rossiyaliklar BTR-50 ni havo nishonlariga qarshi ZU-23-2 zenit qurollari bilan jihozlagani ma’lum bo‘ldi.
Mojarodagi tomonlarning yo‘qotishlarini vizual dalillar bilan hisoblab boradigan Oryx tahlil portaliga ko‘ra, Ukraina armiyasi 2023-yildan buyon bu turdagi texnikalardan jami 10 tasini safdan chiqargan.
Qariyb 70 yoshdagi texnikalarning jang maydonida paydo bo‘lishi Rossiya armiyasi o‘z bo‘linmalarini zirhli transport vositalari bilan ta'minlashda qiyinchiliklarga duch kelayotganidan dalolat beradi.
Izoh (0)