Checheniston rahbari Ramzan Qodirov urush zonasidagi harbiylar ehtiyoji uchun texnikalar partiyasini yubordi. U qo‘llab-quvvatlash aksiyasini Rossiya prezidenti Vladimir Putinning tug‘ilgan kuni bilan bog‘ladi.
Prezidentimiz Vladimir Putinning tug‘ilgan kunida biz maxsus harbiy operatsiya ehtiyojlari uchun katta miqdordagi texnikani topshirdik. Tez orada jangchilarimizga 78 ta UAZ “Patriot”, UAZ-452 va “Niva” avtomobillari yetkazib beriladi, dedi u.
Qodirov ushbu modellar turli iqlim sharoitlarida ishlay oladigan ishonchli va universal transport vositasi ekanini aytdi. U sotib olingan dronlar ham frontga yuborilishini ta’kidladi.
Ular bo‘linmalarimizning jangovar qobiliyati va samaradorligini sezilarli darajada oshiradi. Zamonaviy texnika va uskunalar, shu jumladan, radioelektron kurash tizimlari (REB) nafaqat jangchilarimizning vazifasini yengillashtiradi, balki ularning harakatchanligini sezilarli darajada oshiradi, deya xulosa qildi Checheniston rahbari.
Avvalroq Ramzan Qodirov urush ehtiyojlari uchun Rossiyaga 100 ta “Jihod mashinasi”ni bergandi. Checheniston rahbariga ko‘ra, mintaqada 2024-yilda “Chechenavto” bazasida “GAZ Sobol” va “GAZ Sadko” shassilari asosida jangovar mashinalarni seriyali ishlab chiqarish yo‘lga qo‘yilgan.
“Jihod mashinalari” esa Gudermesdagi Rossiya maxsus kuchlari universitetida sinovdan o‘tkazilgan. Chechnya Today nashrining ma’lum qilishicha, jami 400 ga yaqin jangovar avtomobil yetkazib berish rejalashtirilgan.
Izoh (0)