Toshkent aeroportida uchib ketayotgan yo‘lovchilar uchun kutish hududi kengaytirildi

Toshkent xalqaro aeroporti uchish zalining “steril” hududi yana 2 ming kvadrat metrga kengaytirildi.

Uzbekistan Airports matbuoit xizmatining ma’lum qilishicha, yangi maydon kutish zalining chap tomonida, Art bazar savdo nuqtalaridan keyin ochildi.

Loyihaga ko‘ra, ushbu zalda o‘rindiqlar bilan jihozlangan keng kutish hududi hamda fud-kort tashkil etish ko‘zda tutilgan. Ayni paytda E-auksion.uz platformasidagi savdolar natijalariga ko‘ra ikkita kompaniya bilan shartnomalar tuzilgan.

Qayd etilishicha, qo‘shimcha zalning qurilishi umumiy jo‘nash zalini B5-B6-B7 chiqish yo‘laklari bilan ulash imkonini berdi. Bundan tashqari, kelajakda  kelayotgan va ketayotgan yo‘lovchilar oqimini ajratib turuvchi alohida galereya va pastki zaldan bortga chiqish yo‘laklarini ochish mumkin bo‘ladi.

Ayni paytda Toshkent xalqaro aeroportida 2025-yil oxirigacha davom etadigan rekonstruksiya ishlari olib borilmoqda. Ushbu aeroportda yangi kargo terminalini qurish ham rejalashtirilgan. Buning samarasida yuklarga sifatli xizmat ko‘rsatish quvvati 300 tonnaga yetadi.