Buxoroda iste’molga yaroqsiz alkogol mahsulotlarini sotayotganlar ushlandi

Buxoro shahrida iste’molga yaroqsiz alkogol mahsulotlarini sotayotgan shaxslar ushlandi, deb xabar bermoqda Bosh prokuratura huzuridagi departament. 

Unga ko‘ra, departamentning Buxoro shahar bo‘limi tomonidan o‘tkazilgan tergovga qadar tekshiruvda aniqlangan. “Sh.S.” MCHJ rahbari L.Y. va boshqalar MCHJ savdo do‘koni va yerto‘lasida 8 turdagi jami 1 395 dona iste’molga yaroqsiz alkogol mahsulotlarini hamda 570 quti aksiz markasiz tamaki mahsulotlarini sotish maqsadida saqlab kelayotgani aniqlanib, ushbu mahsulotlar ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Toshkent shahrining Chilonzor, Surxondaryo viloyatining Sho‘rchi tumanlari, shuningdek, Samarqand va Urganch shahrida aksiz markasiz tamaki va isteʼmolga yaroqsiz alkogol mahsulotlarini muomalaga kiritilishining oldi olingandi.