Toshkentda “ZiL” 3 yoshli bog‘cha bolasini urib yubordi

Toshkentda yuk mashinasi urib yuborgan bog‘cha bolasi vafot etdi. Bu haqda “Millar” informatsion dasturida ma’lum qilindi.

Qayd etilishicha, 11-iyun kuni Toshkent shahar IIBB Navbatchilik qismiga Uchtepa tumani Ko‘kcha darvoza ko‘chasida yo‘l-transport hodisasi yuz bergani to‘g‘risida xabar kelib tushgan.

“ZiL” haydovchisi xususiy bog‘cha qarshisidan harakatlanib ketayotgan vaqtida 2021-yilda tug‘ilgan bolani urib yuborgan. Natijada 3 yoshli bola olgan tan jarohatlari sabab vafot etgan.

Guvohning so‘zlariga ko‘ra, marhum bolakay akasini ko‘rib, tarbiyachisining qo‘lidan chiqib ketgan.

Haydovchi ham ko‘rmagan, chunki u ham shok holatida edi, — deydi guvoh.

Hozirda mazkur holat yuzasidan Toshkent shahar IIBB Tergov boshqarmasi tomonidan tergovga qadar surishtiruv ishlari olib borilmoqda.

• Avvalroq Toshkent shahar Yashnobod tumanida Captiva urib yuborgan piyoda voqea joyida halok bo‘lgandi.
• Shuningdek, Samarqandda “KamAZ” ayol va uning ikki farzandini urib yuborishi oqibatida bolalar voqea joyida halok bo‘lgani to‘g‘risida xabar berilgan edi.