O‘zbekistonga 2023-yilda qariyb 198 million dollarlik gumanitar yordam kirib keldi. Bu haqda Iqtisodiyot va moliya vazirligi hisobotida so‘z boradi.
Qayd etilishicha, G‘aznachilik tomonidan O‘zbekistonga kirib kelgan gumanitar yordamlar to‘g‘risidagi maʼlumotlar Bojxona qo‘mitasidan olingan maʼlumotlarga asosan tahlil qilinib, hisobi yuritilib kelinmoqda. Mamlakatga 2023-yil yanvar—dekabr oylarida 30 ta davlatdan umumiy qiymati 197 million 842 ming dollar miqdorida gumanitar yordam yuklari kirib kelgan.
Uning asosiy salmog‘i Quyidagi davlatlar hisobiga to‘g‘ri keladi:
- Germaniya – 71 million 379,4 ming dollar (36 foiz);
- Xitoy – 27 million 467,6 ming dollar (13,9 foiz);
- Shveysariya – 20 million 757,8 ming dollar (10,5 foiz);
- AQSH – 23 million 234,2 ming dollar (11,8 foiz);
- Belgiya – 22 million 620,2 ming dollar (11,4 foiz).
Kirib kelgan gumanitar yordam sohalar kesimida tahlil qilinganda, sog‘liqni saqlashga (169 million 233,5 ming dollar), taʼlimga (247,2 ming dollar), Ekologiya va atrof-muhitni muhofaza qilish uchun (943,2 ming dollar) hamda ijtimoiy sohaga (1 million 244,4 ming dollar) yo‘naltirilgan.
Ushbu davrda kirib kelgan gumanitar yordamlarni gumanitar yordam oluvchi tashkilotlar salmog‘iga nisbatan olib tahlil qilinganda, Sog‘liqni saqlash vazirligi huzuridagi Sanitariyaepidemiologik osoyishtalik agentligi 58,2 foizni, “Taʼminot va logistika xizmati” UK 17,2 foizni, Gematologiya ilmiy tadqiqot instituti 10,5 foizni hamda “Sog‘lom avlod uchun” xalqaro xayriya fondi 11,2 foizni tashkil etgan.
Avvalroq O‘zbekiston toshqindan jabrlangan afg‘on xalqiga gumanitar yordam yuborgani to‘g‘risida xabar berilgandi.
Izoh (0)