O‘zbekistonning Saudiya Arabistonidagi elchisi Nodirjon Turgunov Kdot Partners kompaniyasi ijrochi direktori Faysal al-Dovud bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, uchrashuvda mehnat sohasida O‘zbekiston va Saudiya Arabistoni o‘rtasida yo‘lga qo‘yilgan hamkorlik aloqalarini yanada jadallashtirish, Saudiyada ishlayotgan o‘zbekistonliklar haq-huquqlarini taʼminlash va qonuniy migratsiyani tashkil etish masalalari muhokama qilingan.
Faysal al-Dovud ikki davlat o‘rtasida aloqalar barcha jabhalarda rivojlanib borayotganini, saudiyalik ishbilarmon doira vakillarining O‘zbekistonga investitsiya kiritishga qiziqishi ortganini taʼkidlagan. U mamlakatning Gold Step Construction kompaniyasi bilan hamkorlik memorandumi imzolaganini qayd etgan. Maʼlum qilinishicha, kompaniya O‘zbekistondan xizmat ko‘rsatish sohasi vakillari, texniklar va hamshiralarni ishga jalb etishga eʼtibor qaratmoqda.
Ushbu soha mutaxassislariga Saudiya Arabistonida talab juda yuqori. Shuni inobatga olib biz o‘zbek tomoni bilan hamkorlik aloqalarini yo‘lga qo‘yishdan manfaatdormiz, — deydi u.
May oyi boshlarida o‘zbekistonliklar Janubiy Koreyaga qurilish sohasiga ishga yuborilishi mumkinligi to‘g‘risida xabar berilgandi.
Izoh (0)