Qozog‘iston prezidenti Qosim-Jo‘mart To‘qayev 17-may kuni 71 yoshni qarshiladi. U tavallud ayyomini qanday o‘tkazishni rejalashtirayotgani ma’lum qilindi. Bu haqda Tengrinews xabar berdi.
Prezident maslahatchisi va matbuot kotibi Berik Uali bergan ma’lumotga ko‘ra, bu To‘qayev uchun odatiy ish kuni. U ishda bo‘ladi. Ushbu sana munosabati bilan hech qanday tadbir rejalashtirilmagan, administratsiya xodimlaridan tabrikdan voz kechish so‘ralgan. Qozog‘iston prezidenti o‘tgan yillarda ham xuddi shunday yo‘l tutgan.
Bu prezidentning prinsipial pozitsiyasi, uning oilasida bolalarning ham, ota-onalarning ham tug‘ilgan kunini nishonlash odat tusiga kirmagan, — deb tushuntirdi Berik Uali.
Eslatib o‘tamiz, To‘qayev Qozog‘istonning qator hududlarida kuzatilgan suv toshqinlari tufayli og‘ir vaziyatni hisobga olib, byudjet mablag‘larini tejash maqsadida mamlakatda yirik tadbirlarni o‘tkazishni bekor qilgandi.
Izoh (0)