Andijon viloyati Buloqboshi tumanida xitoylik investorlar hamkorligida qurilgan sement ishlab chiqarishni tashkil etish korxonasining ochilish marosimi bo‘lib o‘tdi. Bu haqda viloyat hokimi Shuhrat Abdurahmonov o‘zining Telegram kanalida ma’lum qildi.
Qayd etilishicha, zavod yiliga o‘rtacha 2,5 million tonna (kunda 6 ming tonna) tayyor sement ishlab chiqarishga mo‘ljallangan. Loyiha qiymati 250 million dollarni tashkil etib, Xitoyning Conch International Holdings Limited, Zhejiang Shangfeng Building Materials Co Ltd kompaniyalarining to‘g‘ridan to‘g‘ri investitsiyalari asosida amalga oshirilgan.
Loyihaning eksport salohiyati yiliga 10 million dollarni tashkil etadi, shuningdek, 750 ta ish o‘rni yaratildi. Zavod uchun jami 74 gektar yer maydoni ajratilgan.
Prezident Shavkat Mirziyoyev 29-yanvar kuni o‘tkazgan yig‘ilishda yil yakuniga qadar 112 ta yirik sanoat korxonasi va barcha sement ishlab chiqaruvchilarda zamonaviy chang-gaz tozalash uskunalarini o‘rnatish va eskilarini almashtirish, havoga chang tashlash darajasi yuqori bo‘lgan korxonalarda filtrlarni yangilash muhimligi ta’kidlangandi.
Izoh (0)