Денгиз ва океанлар тубининг геологик тузилиши ҳамда ундаги жонзотлар ҳақидаги маълумотнинг атиги 5 фоизи фанга маълум. Шунинг учун денгиз остидаги дунёни янада чуқурроқ ўрганиш мақсадида Германиянинг EvoLogics технология компанияси муҳандислари Quadroin қурилмасини ишлаб чиқди.
Автоном сувости роботи денгиз ва океанлар тубини, унинг аҳолисини видеотасвирга олади. Сунъий пингвинга ҳаракатланадиган сувости йўлининг траекториясини олдиндан белгилаш муҳимдир. Қабул қилинган маълумотни робот Wi-Fi ёки Iridium орқали узатади.
Тўртта сув ости двигатели ёрдамида робот-пингвин 150 метр чуқурликка туша олади, унинг максимал тезлиги 18,5 км/соатга етади. Шунингдек, Quadroin 7 км/соат тезликда 10 соат узлуксиз ишлай олади.
Қурилмага сунъий интеллект ҳам ўрнатилган бўлиб, кўплаб сонар (товушни аниқлайдиган ва ёзиб оладиган мослама) ҳамда камералар орқали атрофдаги объектларни аниқлай олади, денгиз жонзотлари билан тўқнашиб кетмайди. Nortek Nucleus1000 сувости навигацияси эса робот ҳаракатланиш траекториясини кузатиб боришга хизмат қилади.
Бундан ташқари, робот-пингвин сув остини ўрганиш учун қўшимча жиҳозларга ҳам эга: Quadroin сув босими, ҳарорати, кислород миқдори ва флуоресценция хоссаларини ўргана олади. HD камералар орқали денгиз тубида аниқ ва юқори сифатли фотосуратлар олиш имконияти бор. Ўта чуқур жойга тушган қурилмага махсус фонарлар диод прожекторлар ёрдам беради.
Изоҳ (0)