Rossiya Favqulodda vaziyatlar vazirligi o‘z saytida Moskva viloyatidagi Crocus City Hall konsert zalida yuz bergan terakt oqibatida jabrlangan 99 kishining ro‘yxatini e’lon qildi.
“Soat 04:00 holatiga ko‘ra, Moskva viloyatida jabrlanganlar ro‘yxati”, — deyiladi idora xabarida.
Tergov qo‘mitasi ma’lumotlariga ko‘ra, konsert zaliga hujum oqibatida 60 dan ortiq odam halok bo‘lgan. Sog‘liqni saqlash vaziri Mixail Murashko 115 kishi, jumladan, besh nafar bola shifoxonaga yotqizilganini ma’lum qildi. Uning so‘zlariga ko‘ra, bir bola va 60 nafar katta yoshdagi fuqaro — og‘ir ahvolda.
Moskva viloyati Sog‘liqni saqlash idorasi jarohat olganlar ro‘yxatini e’lon qildi: uning birinchi versiyasida 37 kishi bor edi, ikkinchisi esa 145 kishiga yetkazilgan. Keyinroq Moskva Sog‘liqni saqlash departamenti poytaxt shifoxonalariga olib kelingan 80 kishining ro‘yxatini joylashtirdi.
22-mart kechasi Moskva viloyatidagi “Piknik” guruhining konserti bo‘lib o‘tayotgan Crocus City Hall konsert zalida nomaʼlum shaxslar o‘t ochdi. Binoda portlash sodir bo‘lgan va yong‘in boshlangan. Reuters agentligiga ko‘ra, terakt uchun ISHID mas’uliyatni o‘z zimmasiga olgan.
ISHID jangarilari Moskva atrofida hujumlar amalga oshirib, yuzlab odamlarni o‘ldirib, yaralagani va keyinchalik yashiringani haqida xabar bergan. Hujum tafsilotlari keltirilmagan, — deyiladi xabarda.
Izoh (0)