Sog‘liqni saqlash vazirligi Navro‘z bayrami va dam olish kunlarida tibbiyot muassasalari uzluksiz faoliyat yuritishini ma’lum qildi.
Prezidentning tegishli farmoniga ko‘ra, bu yil Navro‘z umumxalq bayrami munosabati bilan fuqarolar ish haftasining turidan qat’i nazar, ketma-ket 4 kun dam oladi. Ana shu davrda quyidagi davolash-profilaktika muassasalarining 40 ming nafardan ortiq tibbiyot xodimi qonunda belgilangan tartibda, navbatchilik asosida aholiga xizmat ko‘rsatadi:
- 1257 ta ko‘p tarmoqli va oilaviy poliklinika,
- 1080 ta oilaviy shifokor punkti,
- 1002 ta mahalla tibbiyot punkti,
- tuman, viloyat va respublika shifoxonalari,
- ixtisoslashtirilgan tibbiyot markazlari,
- tibbiyot oliy o‘quv yurtlari klinikalari.
Respublika shoshilinch tibbiy yordam ilmiy markazi, uning hududlardagi 13 ta filiali, tumanlardagi 181 ta shoshilinch tibbiy yordam qabul bo‘limi hamda tumanlararo qo‘shma shikastlanishlar va o‘tkir qon-tomir kasalliklari markazlarida 24 soat davomida navbatchi shifokor va hamshiralar faoliyat yuritadi.
Qayd etilishicha, mamlakat bo‘yicha 2755 ta tez tibbiy yordam brigadasi aholidan bo‘ladigan chaqiriqlar asosida kun-u tun xizmat ko‘rsatadi. Bundan tashqari, 227 ta tug‘uruq, 245 ta bolalar davolash muassasasi ham uzluksiz ish olib boradi.
Sog‘liqni saqlash vazirligi bayram kunlarida mehnat qiladigan barcha tibbiyot xodimlariga o‘z minnatdorligini bildirdi.
Izoh (0)