Эндиликда банк ва тўлов тизими орқали хизматларни кўрсатишда телекоммуникациялар соҳасида фаолият юритиш учун лицензия талаб этилмаслиги мумкин. Бу ҳақда 11 март куни бўлиб ўтган Сенатнинг Ахборот сиёсати ва давлат органларида очиқликни таъминлаш масалалари қўмитаси мажлисида таъкидланган.
Маълум қилинишича, мажлисда “Telekomмункациялар тўғрисида”ги қонун дастлабки тарзда муҳокама қилинган.
Таъкидланганидек, бугунги кунга қадар янги қурилган кўп қаватли уйларнинг айримларида тегишли инфратузилма кўзда тутилмагани сабабли қайта қурилиш ишларини олиб боришга тўғри келаётган эди. Шундай оворагарчиликларнинг олдини олиш мақсадида бундан кейин бино ва иншоотлар қурилишида телекоммуникация инфратузилмаси мажбурий бўлади.
Жумладан, кўп қаватли уйларда яшовчиларнинг аризаси бўлганда хизмат кўрсатувчи тадбиркорлик субъектларига бинода мавжуд инфратузилмадан беғараз фойдаланиш имконияти яратилади. Операторларга телекоммуникация инфратузилмаси объектларидан биргаликда фойдаланишга рухсат берилади.
Ушбу ҳолатларга аҳамият берилмаса интернет термоқлари ёки шу каби телекоммуникация тармоқларининг монтаж жараёнлари ягона стандартлар асосида амалга оширилмай, турли муаммоларни келтириб чиқариши мумкин.
Шунингдек, қонун билан телекоммуникация соҳасида фаолият юритувчи субъектларга бир қатор қулайликлар яратилмоқда. Яъни қонун нормаларига кўра эндиликда банк, тўлов тизими, тўлов ташкилоти, электрон тижорат платформаси иловалари орқали хизматларни кўрсатишда телекоммуникациялар соҳасида фаолият юритиш учун лицензия талаб этилмайди.
Бундан ташқари, қонун нормалари конституцияга мослаштирилмоқда, хусусан, қонун 7-моддасига мувофиқ телекоммуникациялар соҳасидаги давлат сиёсатининг асосий йўналишларидан бири сифатида интернет жаҳон ахборот тармоғидан фойдаланишни таъминлаш учун шарт-шароитлар яратиш эканлиги белгилаб қўйилмоқда.
Мажлис сўнгида кўрилган масала юзасидан қўмитанинг тегишли қарори қабул қилинди.
Изоҳ (0)