Surxondaryo viloyati IIB tomonidan tegishli mutasaddi idoralar bilan hamkorlikda o‘tkazilgan tadbirda Boysun tumanida yashovchi 33 yoshli G‘.S. noqonuniy yo‘llar bilan boylik orttirish maqsadida mayning ferma tashkil qilganligi aniqlandi. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, mayning ferma tuman elektr tarmoqlari bilan shartnoma tuzmasdan, 2 dona faol mayning qurilmalarini o‘rnatib, elektr tarmog‘idan noqonuniy foydalanishi natijasida 276 mln 480 ming so‘m miqdorda moddiy zarar yetkazgan.
Mazkur holat yuzasidan G‘.S.ga nisbatan JKning 169-moddasi 2-qismi “d” bandi (o‘g‘rilik umumiy foydalanishdagi elektr, issiqlik, gaz yoki vodoprovod tarmoqlariga tijorat maqsadlarida o‘zboshimchalik bilan ulanish yoxud elektr energiyasini, tabiiy gazni, sovuq yoki issiq suvni hisobga olish asboblariga, shu jumladan ularning plombalariga qasddan shikast yetkazish yoxud hisobga olish asboblarining ko‘rsatkichlarini o‘zgartirish maqsadida ularga tashqaridan aralashish yo‘li bilan) bilan jinoyat ishi qo‘zg‘atilib, tergov, tezkor-qidiruv harakatlari davom ettirilmoqda.
Izoh (0)