Сурхондарё вилояти ИИБ томонидан тегишли мутасадди идоралар билан ҳамкорликда ўтказилган тадбирда Бойсун туманида яшовчи 33 ёшли Ғ.С. ноқонуний йўллар билан бойлик орттириш мақсадида майнинг ферма ташкил қилганлиги аниқланди. Бу ҳақда Киберхавфсизлик маркази матбуот хизмати хабар берди.
Маълум қилинишича, майнинг ферма туман электр тармоқлари билан шартнома тузмасдан, 2 дона фаол майнинг қурилмаларини ўрнатиб, электр тармоғидан ноқонуний фойдаланиши натижасида 276 млн 480 минг сўм миқдорда моддий зарар етказган.
Мазкур ҳолат юзасидан Ғ.С.га нисбатан ЖКнинг 169-моддаси 2-қисми “д” банди (ўғрилик умумий фойдаланишдаги электр, иссиқлик, газ ёки водопровод тармоқларига тижорат мақсадларида ўзбошимчалик билан уланиш ёхуд электр энергиясини, табиий газни, совуқ ёки иссиқ сувни ҳисобга олиш асбобларига, шу жумладан уларнинг пломбаларига қасддан шикаст етказиш ёхуд ҳисобга олиш асбобларининг кўрсаткичларини ўзгартириш мақсадида уларга ташқаридан аралашиш йўли билан) билан жиноят иши қўзғатилиб, тергов, тезкор-қидирув ҳаракатлари давом эттирилмоқда.
Изоҳ (0)