Namangan va Surxondaryo viloyatlarida noqonuniy yo‘llar bilan o‘qishga kiritib qo‘yishni vaʼda qilgan shaxslar ushlandi, deb xabar beradi Bosh prokuratura huzuridagi departament.
Qayd etilishicha, departamentining Mingbuloq tuman bo‘limi tomonidan tergovga qadar tekshiruv o‘tkazilgan. Tekshiruvda O‘.N. ismli shaxs fuqarolar D.E. va A.D.ning ishonchiga kirib, go‘yoki yuqori lavozimda ishlovchi tanishlari yordamida ularning Rossiya hamda qo‘shni Qirg‘izistondagi o‘qishini Namangan viloyatidagi oliy taʼlim muassasalariga ko‘chirib berishini aytib, evaziga 4,5 ming dollarni firibgarlik yo‘li bilan qo‘lga kiritgani aniqlangan.
Shu kabi, departamentning Surxondaryo viloyat boshqarmasi, DXX va IIB xodimlari hamkorligida o‘tkazilgan tezkor tadbirda M.M. ismli shaxs fuqaro M.U.ning ishonchiga kirib, uni tanishlari yordamida Qarshi shahridagi Xalqaro Innovatsion universitetining 3-bosqichiga o‘qishga kiritib qo‘yishi evaziga 1 000 dollar va 1,2 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Buxoro va Farg‘ona viloyatlarida o‘qishni ko‘chirib berish bilan bog‘liq firibgarlik holatlariga chek qo‘yilgandi. Shuningdek, O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgan edi.
Izoh (0)