Olimlar do‘kondan olingan kiyimni kiyishdan avval yuvish zarur deb maslahat beradi. Agar yangi kiyimni kir mashinasida yuvishning imkoni bo‘lmasa, uni dazmol qilish ham mumkin. Yangi xarid qilingan kiyimni yuvishdan asosiy maqsad – uni turli infeksiya va bakteriyalardan tozalashdir. Sabablari:
Har qanday kiyim avval kiyib ko‘rilgan bo‘ladi
Do‘kondan yoki onlayn sotib olingan kiyim-kechaklarni sizdan avval albatta kimdir sinab ko‘rganligi shubhasiz. Bunday kiyimni yuvmasdan ishlatish oqibati haqida Kolumbiya universiteti dermatologi Donald Belsito amaliyotida uchratgan noxush holatlar misolida so‘zlab berdi.
Menga murojaat qilgan bir bemor o‘ziga kiyim orqali bit yuqtirib olgandi. Undan tashqari, turli xil zamburug‘lar, qichima kabi toshmali kasalliklar shu yo‘l bilan yuqishi tez-tez uchrab turadi,— deydi dermatolog.
Yangi kiyimlarda zararli kimyoviy moddalar mavjud
Ishlab chiqaruvchilar kiyimlarni yaxshi holatda saqlash uchun turli xil kimyoviy moddalar bilan ishlov beradi, masalan, formaldegid bilan. Ushbu modda omborda saqlash va uzoq yo‘lga tashish vaqtida namlik va mog‘orga qarshi samarali usul hisoblanadi. Formaldegid bilan kontakt terining yallig‘lanishiga olib keladi. Bu esa keyinchalik ekzemani keltirib chiqarish ehtimoli yuqori. Eng yomoni – formaldegid kanserogen modda sanaladi.
Yangi kiyim xarid qilgach qanday yo‘l tutish lozim?
Buyumni sotib olgandan so‘ng darhol yorliqdagi ko‘rsatmalarga muvofiq uni yuving. Ayniqsa, chaqaloqlar va yosh bolalar yangi kiyimlarini yuvish muhimdir. Barchaga ma’lumki, bolalarning terisi o‘ta nozik va ta’sirchan bo‘ladi. Bundan tashqari, sport kiyimlarini ham yuvish kerakligini unutmang, chunki tana terlagan vaqtda teridagi mayda teshiklar ko‘proq ochiladi va tarkibida bakteriyalar bo‘lgan kimyoviy moddalar teri orqali tezroq so‘riladi.
Agar kiyimni faqat quruq tozalash usulida yuvishi kerak bo‘lsa, uni 3 soat davomida sovuqqa qo‘ying. Noldan past harorat ko‘plab bakteriyalarni bartaraf etish xususiyatiga ega.
Izoh (0)