Олимлар дўкондан олинган кийимни кийишдан аввал ювиш зарур деб маслаҳат беради. Агар янги кийимни кир машинасида ювишнинг имкони бўлмаса, уни дазмол қилиш ҳам мумкин. Янги харид қилинган кийимни ювишдан асосий мақсад – уни турли инфекция ва бактериялардан тозалашдир. Сабаблари:
Ҳар қандай кийим аввал кийиб кўрилган бўлади
Дўкондан ёки онлайн сотиб олинган кийим-кечакларни сиздан аввал албатта кимдир синаб кўрганлиги шубҳасиз. Бундай кийимни ювмасдан ишлатиш оқибати ҳақида Колумбия университети дерматологи Дональд Белсито амалиётида учратган нохуш ҳолатлар мисолида сўзлаб берди.
Менга мурожаат қилган бир бемор ўзига кийим орқали бит юқтириб олганди. Ундан ташқари, турли хил замбуруғлар, қичима каби тошмали касалликлар шу йўл билан юқиши тез-тез учраб туради,— дейди дерматолог.
Янги кийимларда зарарли кимёвий моддалар мавжуд
Ишлаб чиқарувчилар кийимларни яхши ҳолатда сақлаш учун турли хил кимёвий моддалар билан ишлов беради, масалан, формалдегид билан. Ушбу модда омборда сақлаш ва узоқ йўлга ташиш вақтида намлик ва моғорга қарши самарали усул ҳисобланади. Формалдегид билан контакт терининг яллиғланишига олиб келади. Бу эса кейинчалик экземани келтириб чиқариш эҳтимоли юқори. Энг ёмони – формалдегид кансероген модда саналади.
Янги кийим харид қилгач қандай йўл тутиш лозим?
Буюмни сотиб олгандан сўнг дарҳол ёрлиқдаги кўрсатмаларга мувофиқ уни ювинг. Айниқса, чақалоқлар ва ёш болалар янги кийимларини ювиш муҳимдир. Барчага маълумки, болаларнинг териси ўта нозик ва таъсирчан бўлади. Бундан ташқари, спорт кийимларини ҳам ювиш кераклигини унутманг, чунки тана терлаган вақтда теридаги майда тешиклар кўпроқ очилади ва таркибида бактериялар бўлган кимёвий моддалар тери орқали тезроқ сўрилади.
Агар кийимни фақат қуруқ тозалаш усулида ювиши керак бўлса, уни 3 соат давомида совуққа қўйинг. Нолдан паст ҳарорат кўплаб бактерияларни бартараф этиш хусусиятига эга.
Изоҳ (0)