Turkiyaning janubi-sharqiy viloyatlarida sodir bo‘lgan zilzila paytida betonlar ostida qolgan uch oylik chaqaloq bugun 1 yoshdan oshdi. U ayni kunda ota-onasi bilan Qahramonmarash viloyatidagi konteyner uylarda istiqomat qilmoqda. “Daryo” jurnalisti Turkiyaga safari davomida qizaloqning ota-onasini suhbatga tortdi.
Qahramonmarashda sodir bo‘lgan zilziladan so‘ng men, ayolim va uch oylik chaqalog‘imiz — qizalog‘im Fatmanaz Durmaz bilan uch kun betonlar tagida qolib ketdik. U yerda oilamga — ayolim va qizimga birinchi yordamni ko‘rsatishga harakat qildim. Imkonim boricha, g‘amxo‘rlik qildim. Biroq u yerdagi vaziyat juda ham og‘ir edi. Bizga so‘nggi sakkiz soatda yordam kelmasa, hozir yashamayotgan bo‘lardik. Sababi betonlar osti judayam sovuq edi. O‘sha kunlari qor yog‘gani sabab bu sovuq ikki baravar kuchli edi. Xayriyatki, o‘z vaqtida yordam keldi. AFAD qutqaruvchilari va davlatimizga rahmat, bizga yordam berishdi. Ulardan minnatdormiz, — deydi o‘sha kungi voqealarni yodga olgan Jebrail Durmaz.
Suhbatdoshning aytishicha, o‘sha kungi zilzila va uning dahshati, shuningdek, uch kun zilzila qoldiqlari ostida yashaganini eslasa, qo‘rqib ketadi.
Zilzila vahimasining o‘zi judayam qo‘rqinchli edi. Binoning qulab, pastga tushib ketishi va u yerda uch kun qolib ketishni tasavvur ham qilish qiyin, — deydi suhbatdosh.
Jebrail Durmazning xotini Emine zilzila juda qo‘rqinchli bo‘lganini, shu sabab Yaratgandan bu holat qayta takrorlanmasligini so‘rashini aytadi.
Bu juda ayanchli voqea edi. Bu voqeaning boshqa yuz bermasligini istamaymiz va Yaratgandan ham shuni so‘raymiz. Hozirgi hayotimizdan judayam mamnunmiz. Hukumatimiz bizga barcha sharoitlarni qilib berdi, minnatdormiz», — deydi Emine Durmaz.
Qahramonmarash viloyati hokimligining ma’lumot berishicha, zilziladan so‘ng viloyat markazida uysiz qolganlar uchun 68 ming 962 ta, qishloq mahallalarida esa 66 ta konteyner o‘rnatilib, uy sifatida foydalanib kelinmoqda. Fatmanaz Durmaz va uning ota-onasi ana shunday konteynerlardan birida yashaydi.
Izoh (0)