Туркиянинг жануби-шарқий вилоятларида содир бўлган зилзила пайтида бетонлар остида қолган уч ойлик чақалоқ бугун 1 ёшдан ошди. У айни кунда ота-онаси билан Қаҳрамонмараш вилоятидаги контейнер уйларда истиқомат қилмоқда. “Дарё” журналисти Туркияга сафари давомида қизалоқнинг ота-онасини суҳбатга тортди.
Қаҳрамонмарашда содир бўлган зилзиладан сўнг мен, аёлим ва уч ойлик чақалоғимиз — қизалоғим Фатманаз Дурмаз билан уч кун бетонлар тагида қолиб кетдик. У ерда оиламга — аёлим ва қизимга биринчи ёрдамни кўрсатишга ҳаракат қилдим. Имконим борича, ғамхўрлик қилдим. Бироқ у ердаги вазият жуда ҳам оғир эди. Бизга сўнгги саккиз соатда ёрдам келмаса, ҳозир яшамаётган бўлардик. Сабаби бетонлар ости жудаям совуқ эди. Ўша кунлари қор ёғгани сабаб бу совуқ икки баравар кучли эди. Хайриятки, ўз вақтида ёрдам келди. AFAD қутқарувчилари ва давлатимизга раҳмат, бизга ёрдам беришди. Улардан миннатдормиз, — дейди ўша кунги воқеаларни ёдга олган Жебраил Дурмаз.
Суҳбатдошнинг айтишича, ўша кунги зилзила ва унинг даҳшати, шунингдек, уч кун зилзила қолдиқлари остида яшаганини эсласа, қўрқиб кетади.
Зилзила ваҳимасининг ўзи жудаям қўрқинчли эди. Бинонинг қулаб, пастга тушиб кетиши ва у ерда уч кун қолиб кетишни тасаввур ҳам қилиш қийин, — дейди суҳбатдош.
Жебраил Дурмазнинг хотини Эмине зилзила жуда қўрқинчли бўлганини, шу сабаб Яратгандан бу ҳолат қайта такрорланмаслигини сўрашини айтади.
Бу жуда аянчли воқеа эди. Бу воқеанинг бошқа юз бермаслигини истамаймиз ва Яратгандан ҳам шуни сўраймиз. Ҳозирги ҳаётимиздан жудаям мамнунмиз. Ҳукуматимиз бизга барча шароитларни қилиб берди, миннатдормиз», — дейди Эмине Дурмаз.
Қаҳрамонмараш вилояти ҳокимлигининг маълумот беришича, зилзиладан сўнг вилоят марказида уйсиз қолганлар учун 68 минг 962 та, қишлоқ маҳаллаларида эса 66 та контейнер ўрнатилиб, уй сифатида фойдаланиб келинмоқда. Фатманаз Дурмаз ва унинг ота-онаси ана шундай контейнерлардан бирида яшайди.
Изоҳ (0)