Janubiy Koreyaning Hancom Group kompaniyasi O‘zbekistonda IT-ta’lim ekotizimini rivojlantiradi. Bu haqda Raqamli texnologiyalar vaziri o‘rinbosari Rustam Karimjonov ma’lum qildi.
O‘zbekistonda Janubiy Koreyaning ilg‘or raqamli ta’limini joriy qilish maqsadida Raqamli texnologiyalar vazirligida Hancom Academy vakillari ishtirokida anglashiluv memorandumi imzolandi. Kelishuvga asosan, kompaniya tarkibiga kiruvchi Hancom Academy O‘zbekiston bo‘ylab IT sohasiga qiziqishi yuqori bo‘lgan iqtidorli yoshlarni saralab ularni Data science, Artificial and Cloud technologies, Software engineering kabi kelajak kasblariga o‘qitish dasturini yo‘lga qo‘yadi.
Shuningdek, Hancom Academy tomonidan ishlab chiqilgan alohida o‘quv dasturi bo‘yicha mahalliy IT mentorlarni tayyorlash tizimi yo‘lga qo‘yiladi.
O‘quv dasturi yoshlarga O‘zbekiston va jahonda talab katta bo‘lgan hamda yuqori maosh to‘lanadigan kasblarni o‘rgatishga mo‘ljallangan. Dastur bitiruvchilari kelajakda yuqori daromadli kasb egasi bo‘lish hamda chet elga IT xizmatlar eksporti bilan shug‘ullanish imkoniyatiga ega bo‘ladi.
Ma’lumot uchun, Hancom Group 1990-yil tashkil etilgan bo‘lib, Janubiy Koreyada Microsoft Office o‘rnini bosa oladigan Hangul Korean Word dasturiy ta’minotini yaratish bilan Koreyada tanilgan kompaniyadir. Hancom Groupning sun’iy intellekt, dron va boshqa ilg‘or texnologiyalarni o‘qitishga ixtisoslashgan onlayn ta’lim platformasiga ega yirik IT akademiya — Hancom Academy sho‘ba tashkiloti mavjud.
Ushbu IT akademiya Koreya Respublikasida yirik korxonalar, jumladan Samsung Electronics, SK Telecom, KT, LG Electronics xodimlari va davlat xizmatchilari malakasini oshirish bilan shug‘ullanadi, hamda yirik universitetlar bilan hamkorlik qiladi.
Izoh (0)