“O‘zbekinvest” eksport-import sug‘urta kompaniyasi GlowByte xalqaro IT tashkiloti hamkorligida 2024-yildan boshlab O‘zbekiston sug‘urta bozorida birinchi bo‘lib real vaqt rejimida mavjud maʼlumotlardan foydalangan holda qaror chiqarish imkoniyatini beruvchi (ML) sug‘urtalashdan avval innovatsion tekshirish tizimini (Talys.SDE) ishga tushirmoqda. Dasturiy taʼminot Data Sapience ko‘magida ishlab chiqilgan.
GlowByte sug‘urta amaliyoti rahbari Yevgeniy Chernoburovning so‘zlariga ko‘ra, yaratilayotgan tizim kelgusida skoring, avtomatlashtirilgan holda individual tariflarni hisoblash, qarorlar qabul qilish hamda sug‘urta shartnomasini tuzish bosqichidagi ehtimoliy yo‘qotishlarni baholash imkonini beradi. Bu kabi loyiha O‘zbekistonda, xususan, respublika sug‘urta kompaniyalari ichida birinchi bo‘ladi.
Qarorlarni qabul qilish axborot tizimi - bu barcha mavjud maʼlumot manbalari (jarimalar, kredit tarixi, yosh, haydovchilik tajribasi, yo‘l harakati qoidalarini buzganlik va boshqalar)ga ulanish, serverlardagi maʼlumotlarni tahlil qilish uchun olish hamda olingan maʼlumotlar asosida bir zumda tahlil amalga oshirish havf-xatar darajasini hisoblashdir.
“O‘zbekinvest” sug‘urta kompaniyasi sunʼiy intellekt modellari yordamida potensial muammoli mijozlarni aniqlaydi va shunga mos ravishda sug‘urta qaltisliklarini yanada oqilona boshqaradi. Sunʼiy intellektdan foydalanish anderrayting jarayonida, kompaniyaning umumiy mijozlar bazasidagi 87 foiz maʼlumotlarni qayta ishlash imkonini beradi.
Loyihani amalga oshirishda 20 terabaytdan ortiq sig‘imga ega bo‘lgan korporativ maʼlumotlar bazasini yaratishga alohida eʼtibor berilgan bo‘lib, u nafaqat kompaniya uchun ishonchli axborotlarning yagona manbai bo‘lib xizmat qiladi, balki boshqaruv qarorlarini qabul qilish sifatini oshiradi hamda aniq va ishonchli maʼlumotlarga asoslangan biznesni boshqarish imkonini beradi.
Anderrayting jarayoniga sunʼiy intellektning joriy qilinishi “O‘zbekinvest” sug‘urta kompaniyasining to‘liq raqamli transformatsiyasi yo‘lidagi navbatdagi eng muhim qadami hisoblanib, barqaror o‘sishni taʼminlaydi. Shuningdek, uning bozordagi yetakchilik mavqeini mustahkamlash bilan birga, O‘zbekiston sug‘urta bozorini rivojlantirish uchun texnologik platforma yaratishga turtki beradi.
Reklama huquqi asosida.
Izoh (0)