Tashkillashtirilgan odamlar kolonnasi Meksika janubidan AQSH chegarasiga harakatlana boshladi. “Qashshoqlikdan chiqish” deb nomlangan marshda AQSHga yo‘l olgan minglab muhojirlar Meksikada tranzitda bo‘lib turibdi, deb xabar berdi AFP 25-dekabr kuni.
Marsh tashkilotchilarining so‘zlariga ko‘ra, kolonnada 24 ta davlat, jumladan, Afrika va Osiyo mamlakatlari vakillari bor. Reuters agentligi Meksikaning mintaqaviy rasmiylariga tayanib, yurishda 8 mingdan ortiq kishi qatnashayotganini yozmoqda. Ular Tapachula shahridan AQSH chegarasiga yetib borishni maqsad qilgan. Marsh ishtirokchilarining bundan keyingi niyati haqida ma’lumot yo‘q.
Aksiya tashkilotchilarining so‘zlariga ko‘ra, “Qashshoqlikdan chiqish” Meksika rasmiylari tomonidan immigratsiya qonunlarini kuchaytirishga qarshi norozilikdir. Faollarga ko‘ra, bir muddat avval xorijliklarga mamlakat orqali tranzit o‘tish uchun ruxsatnoma berish to‘xtatilgan.
AQSH Meksikadan muhojirlar tranzitini cheklashni talab qilmoqda
Meksikaning tranzit qoidalarini kuchaytirishi AQSHning janubiy chegara orqali noqonuniy muhojirlar oqimini kamaytirish talablari bilan bog‘liq bo‘lishi mumkin. So‘nggi haftalarda Qo‘shma Shtatlarda bu masala bo‘yicha qizg‘in munozaralar bo‘lib o‘tdi — AQSH Kongressidagi Respublikachilar partiyasi vakillari chegaradagi vaziyat tufayli Ukrainaga Rossiyadan himoyalanish uchun yordam ajratishni ma’qullashdan bosh tortdi.
Noqonuniy migratsiya masalasi 27-dekabr, chorshanba kuni AQSH davlat kotibi Entoni Blinken va ichki xavfsizlik xizmati vakillarining Meksika prezidenti Andres Manuel Lopes Obrador bilan uchrashuvida muhokama qilinadi. Obrador avvalroq Meksika bu sohada qattiqroq choralar ko‘rishini aytgandi.
Amerika chegara xizmati vakillariga ko‘ra, har kuni o‘n mingga yaqin odam Meksika va AQSH o‘rtasidagi chegarani kesib o‘tadi.
Yevropa ham migratsiya inqirozi yoqasida
Yevropa Ittifoqi ham bir necha oydan beri noqonuniy muhojirlarning kelishi bilan bog‘liq qiyinchiliklarni boshdan kechirmoqda. Gap nafaqat O‘rta Yer dengizi orqali Yevropaga yetib kelgan Afrika davlatlaridan kelgan muhojirlar, balki Rossiyadan uyushtirilgan tarzda Finlyandiya chegarasiga olib kelingan uchinchi davlat fuqarolari haqida ketmoqda.
Finlyandiya prezidenti Sauli Niinistyo Rossiya orqali kelayotgan muhojirlar oqimini mamlakat NATOga qo‘shilgani uchun “Kreml qasosi”, deb hisoblaydi. Finlyandiya avvalroq muhojirlar oqimining oldini olish maqsadida Rossiya bilan chegaradagi barcha nazorat-o‘tkazish punktlarini yopgan edi. Dekabr oyi o‘rtalarida Finlyandiya hukumati cheklovlarni yumshatdi, biroq oradan 24 soat o‘tmay nazorat punktini yana yopishga majbur bo‘ldi.
Izoh (0)