Rossiyaning O‘zbekistondagi elchisi TIVga chaqirtirildi

Rossiyaning O‘zbekistondagi elchisi Oleg Malginov Tashqi ishlar vazirligiga chaqirtirildi. Bu haqda vazirlik matbuot xizmati xabar berdi.

Uchrashuvda elchiga “Spravedlivaya Rossiya — za pravdu” partiyasi hamraisi Zaxar Prilepinning O‘zbekistonni Rossiyaga qo‘shib olish zarurligi haqidagi taklifi Respublikada chuqur tashvish hissi bilan qabul qilingani qat’iy tarzda yetkazildi.

Rossiya kabi do‘st mamlakat partiya rahbarlarining bunday o‘ylamay bildirayotgan munosabatlari, afsuski, O‘zbekiston va Rossiya o‘rtasidagi har tomonlama strategik sheriklik va ittifoqchilik ruhiga mos kelmasligi ma’lum qilindi. 

Rossiya ommaviy axborot vositalarida keng tarqalgan bu kabi bayonotlar ataylab provokatsion ruhda bo‘lib, xalqlarimiz o‘rtasida o‘rnatilgan tarixiy do‘stona munosabatlarga salbiy ta’sir ko‘rsatishi mumkin.

“O‘z navbatida, Oleg Malginov to‘liq mas’uliyat bilan Prilepinning bayonotlari Rossiya rahbariyatining do‘st va mustaqil O‘zbekiston to‘g‘risidagi rasmiy pozitsiyasiga umuman aloqasi yo‘qligini ta’kidladi”, — deyiladi TIV xabarida.

Rossiyaning O‘zbekistondagi vakili sifatida elchi “O‘zbekiston Respublikasining suvereniteti, mustaqilligi va hududiy yaxlitligi uning mamlakatida hech qachon shubhaga olinmagan”ini bildirdi. Rossiya Tashqi ishlar vazirligi yaqin vaqt ichida hodisa bo‘yicha izoh berishi kutilmoqda.