Toshkent shahri misolida avtobusning yengil transportga nisbatan samaradorligi 135 barobarni tashkil etmoqda, deb xabar beradi Transport vazirligi matbuot xizmati.
Tahlillarga ko‘ra, bitta yengil avtotransport vositasida bir kunda o‘rtacha 4,3 ta yo‘lovchi, bitta avtobusda esa o‘rtacha 580 ta yo‘lovchi tashilmoqda.
O‘tkazilgan transport makromodeli tahlillariga ko‘ra poytaxtdagi mobil aholining kunlik harakatlanish (qatnov) soni o‘rtacha 9 milliontani tashkil etib, shundan 6 million qatnov transportda amalga oshiriladi. Transportda amalga oshirilayotgan qatnovlarning 1,7milliontasi (28 foiz) jamoat transporti, 4,3 milliontasi yengil avtotransport hissasiga to‘g‘ri kelmoqda.
Poytaxtning transport vositalari doimiy harakatlanadigan asosiy 73 ta ko‘chasining uzunligi 472 kilometrni tashkil etib, o‘rtacha 380-400 mingta avtotransport harakatlanishiga mo‘ljallangan.
Hozirda shaharda kun davomida o‘rtacha 1 millionga yaqin avtotransport harakatlanmoqda. Bu yo‘llarda bir vaqtda harakatlanish sig‘imidan 2 barobar ko‘p.
Avgust oyida Toshkent shahar IIBB tomonidan shaharda tig‘iz vaqtlarda yuk mashinalarining harakatlanishini cheklash masalasi o‘rganilayotgani to‘g‘risida xabar berilgandi. Unga ko‘ra, yuk avtomobillarining harakati ertalab soat 07:00 dan 10:00 gacha va kechki soat 17:00 dan 20:00 gacha bo‘lgan vaqt oralig‘ida cheklanishi mumkin.
Izoh (0)